رد: عتابا .......................

كنعان كنعان الثلاثاء مايو 12, 2009 8:20 pm

هـَتـَفـْنَا بْإسْمِكْ تـَ نْبَحَّينَا مِنْ هـَتـِفـْنَا
حَــاسدينْ عْيـونِكْ انشـالله مِنْهَا تـِفـْنَىْ
سمعْتْ صَوتِكْ عَمْ يِطْلَعْ مِنْ هاتـِفـْنَا
صِرتْ بَوّسْ عَ الحيطانْ كَبلاتـِنَا

COBRA الثلاثاء مايو 12, 2009 10:47 pm

دعاء لـ كنعان

ريتو ربي بالغربة يحفظك ويـِعِينَك

و بحياتو طبيب ما يشوفك ويعَايْنَك

يـ َعينك تشـوف يا كنعـان يـَ عَيْنـَك

كيف مشتقلك و ناطرك تجي بـ آبْ

كنعان كنعان الأربعاء مايو 13, 2009 3:47 pm

خيي مارسيل من شعرك صار بدي طبيب

يا كوبرا وَزْنـَكْ مْدَوزَنْ عَ طـَبْلِـهْ
صابْنيْ بالقلبْ شرايينيْ عَطَبْ لِيْ
أنا المِنْصَابْ وعَمْ دَوِّرْ عَ طـُبْ لِيْ
داوينيْ بشِعْرَكْ تـَ إشْفـَى مِنْ المْصَــابْ

كنعان كنعان الأربعاء مايو 13, 2009 4:20 pm

نــجّــار

شَغِلتيْ نـَجّارْ و بالخَشَبْ بْنـْـجـُرْ
بْرَكِّبْ نـِجرْ * .. ولـَلْبـَابْ بـْنـْـجـُرْ *
مَرْقـِتْ قـْباليْ وقـَالتْ بـُونْ جورْ
صرتْ اتـْفـَرْكَشْ بْلواحْ الـخـَشَبْ

* قفل
* بقفل

magdeeb الأربعاء مايو 13, 2009 6:52 pm

صبية عيونها حلوة كريم *
والخلق عالي طيب كريم
عالوجه مسمّكة طبقة لكريم
مشيوا وراها شلة شباب

* غزال

يا حلوة اللي كياني قلبتيه
الخجل اللي على خدودك قلب تيه*
ارحمي العاشق الوفي اللي قلّبتيه
طول الليل يرسمك صورة بالسحاب

*الدلال

صرلي شهر هالضيعة ما لفّيت
ضايع بين ورق وحبر وملفيت
قصور الفخامة لو سكنت ولفيت*
تراب اليازدية أغلى من الدهب

*لفى بدون شدة , واضطريت أحكي لبناني بالملفيت.

حلوة اللي مضيقا بلبس فيزونها
انشالله بلتقي معها في zone ـــها
وبتحلى القعدة تحت فيّ zone ــها
وبيكون الشيطان ناطر ورا الباب

(zone) في العمارة يعني الحيز أو الركن المخصص لوظيفة ما.

بصراحة يا شباب هالشي اللي متكتبوه رائع استفزني
فاقطعت الدرس وكتبت هالشغلات
يمكن مو قد المستوى اللي متقدموه بس حبيت شارك
وسلامي وأشواقي إلكم جميعاً

الشاعر الأربعاء مايو 13, 2009 8:58 pm

يـــــــا حلوة جمـــــالك عيوني عمالي

وكرمالك أنا بحلف ع روحي وع مالي

وجيـــــــــوش الأرض وظفتن عمالي

يبنولك قصر مزخرف بالدهـــــــــب

COBRA الأربعاء مايو 13, 2009 10:43 pm

ورد

يا قلب ليش واقف العمــر مِشِيْ مشِيْ

و ما في بشر بكل العـالم مِشِيْ مشـَايْ

يا ورد اللي ما شم ريحتك مَا شَـمْ شِيْ

ساح القلب من عـطرك يا ورد و دابْ

BOSS الأربعاء مايو 13, 2009 11:00 pm

اول شي بدي حيي شعراء الضيعة الرائعين جدا وشكرا الكن اكتير خيي مارسيل انا صراحة ماش ادامكن بس متل ما اوعتك طلع معي هلبات بتمنى يعجبكن أنثر قصيدة مثل نثري للأحلام .. غيري تمتع به وأنا ضايق البال وشكرا

كنعان كنعان الخميس مايو 14, 2009 3:22 pm

سَألِتـْنِيْ شِفـْلي هَالفستانْ .. بـِرِحْلِيْ ؟
تـَ إلبسوا ونِطْلَعْ سَوَىْ بـِرِحْلِهْ
قلتلّها لَوْ نِصْ عُمْرِيْ بـِرُحْلِيْ
وتلبسي فساتينْ مفتّحَةْ عَالركـابْ

الشاعر الخميس مايو 14, 2009 8:34 pm

بحبك أنا مجنون وبحبك أنا حرّ

وكرمالك بدوق الحلو أنا و الحر

ولو لهبت الدني وشعلت من الحر

رح خلي السما سودة وشتّي السحاب

COBRA الخميس مايو 14, 2009 9:25 pm

رديلي دموعي

لــو قلبي بحبك مات .... ما تـَعـزِّي

مـات قـلبي الكبير وما مـات عـِـزِّي

لـو أجـوك طالبين دموعي ما تِعِزِّي *

ردي لهم دمعي للي عـ بابك انسكبْ

* لا ترفضي او تبخلي

magdeeb الجمعة مايو 15, 2009 9:56 am

يا كوبرا حصانك صابو عقر مات
ياما داريتو ودفيتو عقرمات
والله لعلق واكتب عقارمات
أنك فارس يا عز الصحاب

(هلق هيي آرمات بس الخطأ الشائع أنو نقول قارمات)

magdeeb الجمعة مايو 15, 2009 10:11 am

يا شاعر العتابا قلمك بقا ابري
حروفك روت فكري كالأرض عقب ري
وان مت أنا اتركولي طاقة بقبري
تا اسمع منها أشعار الشباب

الشباب ( كنعان وظافر وكوبرا)

كنعان كنعان الجمعة مايو 15, 2009 5:56 pm

بأرضْ سوريا لِي فـَيّْ وَ لِي مَيّْ
مَطْرَحْ ما بَدّيْ أنا بعْمُلْ وَلـِيمـِـهْ
بالغُربة أنا جُبْرانْ وَلِي مَيّْ *
تقرا مَرَاسيلي و ترِدْ الجَوَابْ

* جبران خليل ومي زيادة

الشاعر الجمعة مايو 15, 2009 7:27 pm

يــــــا حلوة الحلوين قلبي لحبك شَعَر

وع جمالك كتبت وألفت أغاني وشعر

وبيجن جنوني بـــس تلوحي بهالشعر

ما تجرحيني جرحك مايطيب بقطاب

COBRA الجمعة مايو 15, 2009 9:29 pm

ضيعتنا

يا ضيعتي .....و الله بعبد سـَمَاكِ

تعددت محاسنك و تعددت سِمَـاكِ

والله يا ضيعة ما غلط اللي سَمَّاكِ

نجمة الصـبح.... فـوق الهضَــابْ

COBRA الجمعة مايو 15, 2009 9:42 pm

لـــن أركــــع

ما بركع والله و ما بيهتز ارْتِكـَازي

و بحرقلك قلبـك بـ خَـمْرَاتِ كـَازي

و بخلي عـ الجَّفـا قلبك يـرتِكِي زَي

ركوة مريـض ما يشـفـا من عـذابْ

COBRA الجمعة مايو 15, 2009 10:05 pm

الى صديقي مجد

سيف هالمنتدى بإيدك سنيت حَدُّو

و ضليتك قريب منو ونمت حَـدُّو

يا ما صغار أجو يا مجد و تـَحَدُّو

كنت سـبع ... وحارس هالبـوابْ

كنعان كنعان السبت مايو 16, 2009 4:23 pm

وُجُودِكْ بْحَيَاتِيْ أحْلـَىْ مَرْحَلِيْ
مِنْ بَعدْ ما كانْ كاسِيْ مَرّ حِلِيْ
مَوجْ البَحرْ مِنْ صَوبـِكْ مَرّْ حِلِيْ
وصَارِتْ المَيّْ أحْلَىْ مِنْ الشَرَابْ

الشاعر السبت مايو 16, 2009 8:43 pm

سألتها ليش ماتصلتي قالت : i phone

قلتلها أنا أسف ما شفت ال : i phone

يا ريتو كان ال i phone أيا phone

كنت شفت الكوول ورديت الجواب

COBRA السبت مايو 16, 2009 10:53 pm

بـ ليلة

نمت بحضنك و ايديكي كانت تِلِفـْني

حتى عـ صدرك رب العشق تـَلـَفـْني

وِنْ بـدك يـاني شي مرة بـس تـَلِفـْني

بتلاقيني حاضر عم دقدق عـ البوابْ

كنعان كنعان الأحد مايو 17, 2009 2:48 pm

قـَدِّكْ بِعُمْــرِيْ ما شفتْ قـَدّْ مِــتلوْ
الطبيعةْ السحرْ منْ عِنـْدْهَا قَدّْمِتـلوْ
بْـعُـمْـرِك الإيّـــــام لَـوْ قَدّْمـِتْ لَوْ
بتْضلّي صبيةْ وبــعزْ الشـــــبابْ

magdeeb الأحد مايو 17, 2009 2:53 pm

قاعد عبلكوني ... وببالي عنّيت
قلك بقوم بروح بلاقيك عالــ net
ولما ما لقيتك يا ظافر عنّيت
وبكيت بكي ما بيليق بالشباب

كنعان كنعان الأحد مايو 17, 2009 3:41 pm

منْ موبايلِكْ يا شَقرا مَسّْـجيليْ *
متـْشَنَجْ جِسميْ تعاليْ مَسّْجيليْ *
جيليْ مْشَبْشَبْ والعشقْ مَسّْ جيليْ
جِهلْ الأربعينْ مِنـّوْ الشَعرْ شَــابْ

* بعتي مسج
* عملي مساج

الأخطل الأوسط الأحد مايو 17, 2009 4:46 pm

عهود الشيطنة عشتا وعاصرتا
شي ألف رمانة بإيدي عصرتا
ولما الحلوة بتغفيني ع صرتا
الشيطان بيجي وبيدخل بيناتنا