رد: عتابا .......................

COBRA الإثنين مايو 04, 2009 5:45 pm

يا مســــكـين

من كتر السهر انطرت عيوني تـَفـَشُّو

ولعند طبيب الحب خدت قلبي تـَفِشـُّو

وقلي أمراض الحب بجسـمك تـَفـَشـُّو

حتى تطـيب بدك بوسـة مِن الأحبابْ

الشاعر الثلاثاء مايو 05, 2009 4:03 am

يا حياتي حبي لألك هـــوي حرفتي

ليش بكتاب الحب حــــروفو حرّفتي

أنا كرمال عينك بنصلب ع حرف تي

ولفيني شوف ع خدودك دمعة عذاب

COBRA الثلاثاء مايو 05, 2009 8:43 pm

طير الحب

طـير الحب من خدودك بكـي وغـَار

لما شاف عليهن زهـَّرْ ياسمين وغار

ونهر الحب بين ورداتـن جـرا وغار

بـكي طـير الحـب وعـ حـالو انتحبْ

كنعان كنعان الثلاثاء مايو 05, 2009 9:38 pm

تكنولوجيا

حاسوبِك بطيء هاردو فـَرِمْتي
قلبي عَ غيابِكْ والله فـَرَمْتي
نويتي تعذبيني مرّة فـَ رِمْتي *
تفتحي الكام وتبيني العبابْ

* قصدتي

الشاعر الخميس مايو 07, 2009 7:41 pm

الزمن يا قلبــــــي بحبك عجني

وروحي وراك ع النار أو ع جني

لو همومي وغربتي نزلو ع جني

بيطلع عالأرض ويمشي عالركاب

كنعان كنعان الجمعة مايو 08, 2009 6:55 am

مِنْ أوّلْ نظرَهْ يا حِلوهْ عِشِقـْتـِكْ
مْشتاقْ زُورِكْ دِلـّيني عَ شِقـّتـِكْ
شَقـّيتي القلبْ نصينْ وْ عَ شَقـّتـِكْ
حَسّيَتْ الجرحْ لَحالو انقطبْ

magdeeb الجمعة مايو 08, 2009 11:21 am

شوقي إلكم بحملو ببطاقة---- تتسلل عالقلوب من فتحة شي طاقة
وحق الأنبيا ومزار بوطاقة---- ناطر الصيف تلاقي الحباب

شوقي إلكم بحملو ببطاقة---- تتسلل عالقلوب من فتحة شي طاقة
شركات الموبايل وكل unit ببطاقة---- بترخص لعيونكم يا أغلى شباب

كنعان كنعان الجمعة مايو 08, 2009 2:19 pm

تحية للصديق مجد

شَوقيْ إلـْكـُنْ مَا بينقاسْ بـِ طَاقـَةْ
ولا بْخَطْ و إتصالْ و بـِطاقَةْ
ياريتنيْ عصفورْ مِتـْخَبّيْ بـِ طَاقَةْ
غنّيْ الصبحْ ع َشبّاكْ الحِبـَـابْ

الشاعر الجمعة مايو 08, 2009 5:24 pm

ضربت الدهر ع خدو بـــي كفي

ركعلي وقال يا ظــــــافر بيكفي

والله لحط همومك يادنيي بي كفي

وبي كفي التانية قلبي اللي داب

كنعان كنعان الجمعة مايو 08, 2009 7:24 pm

بحب اشكر مارسيل عالموضوع اللي ماشي أكتر ما توقعت
وبشكر كل اللي عم يشاركوا الصراحة شي حلو كتير يعطيكن العافية

إذا بتريدي بردايتك سَكِّرِيْ
و بخمر حبك قلبي سَكِّرِيْ
خايِفْ لَيصيبني مِنِّكْ سْكَرِيْ
منْ بعد ما دوقْ عَسْلاتِكْ أنـا

الشاعر الجمعة مايو 08, 2009 9:00 pm

مابقدر عيش ولا لحظة بلاكـــــــي

ولو قلبي احترق من شرك وبلاكي

وبلاكي حرق قلبي بلا ....كيّ

وصار رماد من وهـــــــج الغياب

كي : الحرق بأداة معدنية وماشابه ذلك

COBRA السبت مايو 09, 2009 3:59 pm

خيي كنعان الموضوع ماشي بفضل جهودك وجهود الشباب الله يعطيكم العافية

برنامج الإيبدي

الحلوة اللي فاتحة من موبايلا إيبدي

غمزتها وردت عليي وقالت إي بدي

رحت لعندها و وشوشتني وقلتلها اي.......

.......بدي بوسك عـ شفافك وحققلك هالطلب

كنعان كنعان السبت مايو 09, 2009 5:32 pm

قصة شعر

شو بَدّوْ الحلاقْ بْشَعْرِكْ تـَ قـَصّْ فِيهْ
وْ بْقـَصّتِكْ إِلوْ .... عُمْريْ تـِقصْفيهْ
بَعَدْ ما كِنتْ أعْمُلْ طَقسْ فِيهْ
لْغَيتي طْقوسْ الحُبّْ بـَينَاتِنَا

كنعان كنعان الأحد مايو 10, 2009 3:11 pm

بـِعُمْرُو الطمَعْ مَا مَلا عَينْ
ولا النَبعْ النَاشِفْ مَلا عَينْ
أصحابْ البخلْ كلّنْ مَلاعِينْ
مَا بْتِسوَى الدِنْي حَفـْنِةْ تـْرابْ

كنعان كنعان الأحد مايو 10, 2009 5:10 pm

قالوليْ قعودْ عاقـِلْ قـِلِتْ لا
قالوليْ يا تـَرَى عنْ حُبَّكْ قـِلِتـْلا ؟*
قلتلّنْ قـِلِتـْلا وقالِتْ لِيْ : قـُلْ اتـْلا *
شِعْرَكْ عليّيْ بْعطيكْ الجَوَابْ

* قلتلا : قلت لها

* اتلا مِنْ يتلو ويقرأ .

COBRA الأحد مايو 10, 2009 7:52 pm

شو هالصورة الحلوة

هالصورة الحـلوة وين كنت مخَـبِّيْـهَا

وهالصبية لما رأتها ما ضل مِخْ بـِيْهَا

يا كنعان طار مخ إمها وطار مِخْ بَيّهَا

و لك حرام عليك ترميهـن بـ العذابْ

كنعان كنعان الأحد مايو 10, 2009 10:03 pm

يا كوبرا كـْتـَبتْ أبياتـَكْ عَ صُورَهْ
رَجـَّـعتْ للعـَتـابا أقــْدَمْ عـُصُـورا
بـْتعْصُرْ الكلماتْ بـِرَاسَكْ عَصوْرَهْ
بـْتـْنـَقِّطْ عَسَلْ وحروفْ مِنْ دَهـَــبْ

كنعان كنعان الإثنين مايو 11, 2009 3:31 pm

نـَظْرِتْ إِليْ و تـْبَسَّمِتْ بـَسمْتـَينْ
و بَعـْتـِتْ مِنْ عُيونْهَا نَظْرَةْ بـِ سَمْتـَينْ *
انْ رِدتْ سَمّيْ نْهُودْهَا بـِسِمْ تـينْ
بـْتِدبـَلْ بكْرُومْهَا عناقِيدْ الْعـِنـَبْ

نـَظْرِتْ إِليْ و تـْبَسَّمِتْ بـَسمْتـَينْ
و بَعـْتـِتْ مِنْ عُيونْهَا نَظْرَةْ بـِ سَمْتـَينْ
نقطةْ ضعْفِيْ نـَظْرِتْهَا .. بَسْ مْتـينْ *
وقتْ الـشَدَايـِدْ وبْلـَبّيْ الطَلَبْ

* باتجاهين
* بس قوي

الشاعر الإثنين مايو 11, 2009 5:57 pm

كل الناس عم تـــــسال علامي

ونا بالحب من عـــشرة علامة

ونا المهزوم ومنكـــس علامي

ونا المجروح ع غياب الحباب

كنعان كنعان الإثنين مايو 11, 2009 9:11 pm

عَلامـَكْ مَجروحْ يا ظافـِرْ عَلامـَكْ ؟
أشعارَكْ بالقـَلبْ هِيْ نـِقـَطْ عَلامـَكْ
صـَـوبْ السـَـمَا بـِتـْرَفـْرِفْ عَلامـَكْ
وعَـلَمْ ســـوريـّا مِنْ فـَوقْ السّحَابْ

عَلامـَكْ مَجروحْ يا ظافـِرْ عَلامـَكْ ؟
حروفـَكْ يا شاعِرْ عَمْ تِظهـِرْ عِلامـَكْ
خـَلّيْ حَاءَكْ عَمْ تـِسألْ عَـ لامـَكْ
بْتلاقيْ حَـلّْ وبتلاقيْ الجَوابْ

COBRA الإثنين مايو 11, 2009 9:34 pm

ياكنعان اسقينا شعر

يا كـنعان نهـر العتابا هـَلْ فـَ اروي ..

شعـرك وعتابـك مَنـاهـل فــَ اروي ..

يا ريت بتشلح عن جسمك هالفروة

وبتغـطي فيهـا عتـابـاتـنا وشعرنــَا

...هَلْ = أجا أو وصل
...اروي = اسقي

COBRA الإثنين مايو 11, 2009 9:59 pm

خير يا شاعر

عم صيح يا شاعر و بـ تِمِّي جرُوح

يا ظافر خبـرني شو فيك تـَ مَجْرُوح

والله يا خيي بجسمي كلُّو تـَمْ جرُوح *

و اشفي غليلك و طِـيب من العـذابْ

* تم جروح = ضل جروح

الشاعر الثلاثاء مايو 12, 2009 6:06 pm

ياريت ع الصبح بـــس من قهوتك شفي

وبوســـك ع تمك وخلي الشفة ع الشفة

والنبي أيوب لو شافك من مرضو شفي

ونســـــــــــي وجعو وكل أيام العذاب

COBRA الثلاثاء مايو 12, 2009 6:48 pm

وردة وأشواق وعيد

يا حبيب قلــبي بالعيـد قلبــي بـِيْعَيْدَك

و الــوردة اللــي بَعَـتـَّـا إلك بـِ عِيْـدَك

لا شفتها بقريبك ولا شفتها بـ بَعِـيْدَك

تاريك يا غالي حاطتا بـ قـلب كــتابْ

يا ريت طير الشوق لحضني يِـِعِيْدَك

بعيد رجوعك يوقف الكون و يـعَيْدَك

يا فرحتك يا قلب برجوعو وياعـِيْدَك

رجعـوا حبـابي بعد ما طـال الغيابْ

DESPERADO الثلاثاء مايو 12, 2009 6:52 pm

حمص وبناتا

فنجان القهوة اللي بشربو من أحلى بَنَاتـَا

عروسة اللبنة اللي باكلا من أطيب لـَبَنَاتـَا

ما كذب متل قال تقبـرني حمص و بَنـَاتـَا

دايمـاًً فيها مبسـوط وما بشعــر بأي تعبْ