عتابا .......................

COBRA الثلاثاء أبريل 07, 2009 9:53 pm

من بعد اذن المشرف

يلا يا مشرف تـ نعمل صفحة عتابا

تـ نكتب فيها أوف و مووايل وعتابا

ونزين بيوت الشعر ونعــلـّّي عتابا

ونسرح بـ هالافكار لـ فوق السحابْ

***********

كنعان وظافر حروف شعركن مد ّّو

بـ جناين هالمنتدى بساط ورد مد ّو

خللي العتابا متل البحر اللي ارتفع مدّ و

يهيج وبعواصف الشعر يضرب عالبوابْ

طبعا انا مو داعي بس كنعان وظافر
انا بدعي الكل يشارك بس اذكرتن
منشان الوزن ههههههه
**************

رح بلش واكتب حروفي وغرامي

لو بدي ادفع تمن مبادرتي غـرامي

مال الدني كلها ما بيسوى غرام مَي

بين الأحبة بـ هالمنتدى ما في حسابْ

*******************

ريح المسا ع شـعري منـَسَمّي

شعراء وعم ندعيكن من دون منـْسَمِّي

انا كوبرا وديروا بالكن من سـَمِّي

ناطركن وبـ إيدي شـعلة لَهَبْ

bedrous muradian الأربعاء أبريل 08, 2009 9:45 pm

ياغربي تحملت ترحالك و حِلِك

وحبيب القلب حلَك تحن عليَ حلَك

الغربي طالت والليل مهما حلَك

عَ ضيعتنا الرجعة أصبحت عَ البواب

COBRA الأربعاء أبريل 08, 2009 10:14 pm

شـــــــــيـبــة حــــب

ياقلبي بيكفي بقا حيج ولدني

كبرنا وكبرت فينا هالدني

الشعر صار اشيب هدني

وياحسرتي ع ايام الشبابْ

**********

بحبي الك لآخر العمر ماضي

والولدني صارت من الماضي

حبك بقلبي حافرو ... وماضي

ع عربون حبي الك بالدهبْ

bedrous muradian الأربعاء أبريل 08, 2009 10:30 pm

كم عقدة بحبل الدني حليت

وهموم الدني ومرارتها بشهد العسل حليت

ويا كوبرا بعتاباتك عالمنتدى لمَا حليت

سافرت أحلامنا في بحر العتاب

كنعان كنعان الخميس أبريل 09, 2009 7:22 pm

مشكور كوبرا عالفكرة الحلوة ويعطيك العافية
لكن إلي رجاء صغير : ياريت لو الرد يكون فيه بيت عتابا واحد بس منشان يطول الموضوع ويحلا .
وأنا رح رد ببيت واحد وبعدين منرجع .

بِسمْ الشعرْ يَا ناسْ سَمّْوا
كوبْرَا جَايي وْبِالتّمْ سَمّْو
مَا غِلْطُوا وَقتْ هَالاسمْ سَمّْوا
بِيلْسَعْ لَسعْ مِنْ تَحتْ التْرَابْ

COBRA الجمعة أبريل 10, 2009 2:07 am

خيي بيدروس مشكور كتير ع وجودك معنا
الله يعطيك العافية شي حلو كتير

تكرم ياخيي كنعان رح يكون الرد محتوي ع بيت واحد ...طبعا احلى منشان يطول الموضوع
وياريت تثبت الموضع ..................
لكن في بعض الاحيان يمكن يكونوا بيتين مرتبطين ببعض بقا اسمحلنا نتجاوز القوانين

قـســــــــــم

بحلف بعهد الحب والعشرة

مافي عيون بعد عيونك عاشرا

ولو حبوني من الصبايا عشرة

بعد حبك إلي افنى بالتـرابْ

كنعان كنعان الجمعة أبريل 10, 2009 9:02 am

يا ظافِرْ كوبْرَا عَ الْعَرْكِةْ عَزَمْنَا
عِنّا العَزمْ وْ رَحْ نعْرُضْ عَزِمْنَا
لَوْ ذمَ مِشْ رَحْ نِسكُتْ عَ ذَمّْـنـَا
هُوي اللّي بَلـّشْ ْوفَتّحْ هَالبوابْ

COBRA الجمعة أبريل 10, 2009 2:26 pm

توضيح صغير

ياكنعان سيف العتابا بايديك سـِنـّو

واللي متلك قانون الشعر سَـنـّوا

خليك طيب وضحكـك يبان سنـّو

ولاترمي عليي نارك والغضبْ

bedrous muradian الجمعة أبريل 10, 2009 9:25 pm

يا كوبرا بالعتابا كنعان جاييك

لا تهرب ولا تخاف قدامو قال بدَو يفرجيك

من أرض العتابا من قلبي بقلك الله يحييك

ولتوقف بوجو لازم تراجع الحساب

COBRA الجمعة أبريل 10, 2009 11:27 pm

مشروع مشحرة

الصبح بكير.....لمـّا راح الليل منـْجلِي

فقت و سبحت ربّي الجليل المتـْجلـّي

وحملت بإيدي زوادتي وسنـّيت مَنْجَلي

وسرحت بهالبراري دور ع حطبْ

********

تعمشقت بشجرة سنديان معترة مشَحَّرة

من جسما قطـَّعت غصون تـ اعمل مَشْحرة

وصرت قلها أنا مو حر وانت مُشْ حرَّة

الحاجة يا شجرتي اكبر من كلمة عتبْ

magdeeb السبت أبريل 11, 2009 2:34 am

ولك آآآآآآآآآآآآآآآآآآآآآآآآآآآآآآآآآآآآه صيحوا آآآآآآآآآآآآآآآآآآآآآآآآآآآه

الأعادي اللي بمحبتك يكفرون
جونا عن خطاياهم يكفرون
ضيعتنا بتسوى المشتى وكفرون
هيي الجنة ببلاد العرب

تركوا الهجران يا شباب عودوا
قبل ما العمر يصفر عودوا
هالبلد ما عاد ينهز عودو
قبل ما يرجعوا كل الحباب

عذراً لمخالفة القوانين بس الي زمان ما كتبت محقون

bedrous muradian السبت أبريل 11, 2009 11:17 pm

يا غربي عالحبيب داري وحنَي

ولأجلو ليني كل قاسي وحن ني

ويا حلوي لعودتهم زغردي وحنَي

كفوفك وإخلعي حداد التياب

COBRA الأحد أبريل 12, 2009 1:59 pm

تضحية

يا حبيب القلب ليش عني باعدينك

ويا نبع الحب والعشق خليه ينبع دينك

والله لـ بيع ديني وخليك تبيع دينك

حتى سوا نعيش لوحدنا فوق السحابْ

bedrous muradian الأحد أبريل 12, 2009 8:25 pm

يا السَمرة الحلوة ع ضيعتنا تعالي

وبيكفيكي ع قلبي تعالي

وشوفي شو صار وشو عملتي بحالي

على بابك شقيت وشقيت التياب

razor back الأحد أبريل 12, 2009 9:43 pm

أوف أوف أوف

ولك يلي عاليازدية جايي
تعا وطل وشوف الماي
عين مريزة عندا فاي
والسمرة ع بابي جاي

COBRA الأحد أبريل 12, 2009 10:22 pm

رد صغير

ببرودة حكيك انتحرت عبايتي

وشو جاب بيت عتابك ع بيتي

يا دموعي من الضحك جرار عبيتي

هيدا اللي انكتب شو جابو علـ العتابْ

COBRA الأحد أبريل 12, 2009 10:31 pm

يا ضيعتنا

يا ضيعتنا جوا القلب عنك بحثنا

اليازدية يلي ماشفت متلك بحسنا

واسمك لـ وحدو ع وصفك بيحثنا

ياضيعة ما بتوزنك أطنان الدهبْ

كنعان كنعان الإثنين أبريل 13, 2009 2:50 pm

بكل الحب أعلن انسحابي من الموضوع
وبكل تواضع المستوى متدني ويسيء لسمعة الشعر والعتابا , وكمشرف للمنتدى ومن باب الحفاظ على المستوى الجيد على الأقل أقول للبعض أنه ليس صف الكلام بدون وزن ومعنى هو عتابا او شعر
العتابا لها وزنها وضوابطها وبعض ما قرأته في هذه الصفحة لا يمت للعتابا او الشعر بشكل عام بصلة.
أعتذر منكم واطلب من الاصدقاء المتابعة من دون مشاركتي وشكراً .

COBRA الإثنين أبريل 13, 2009 4:52 pm

صرخة

يا كنعان والله انوجع راسك كـَ رَاسْي

ياريت ترجع عهالموضوع وتعبي كـَراسي

بــ شواطي بحر شعرك أنا كـَ راسي

من دون مساعدتك رح تجرفني العبابْ

كنعان كنعان الإثنين أبريل 13, 2009 5:48 pm

COBRA كتب:

صرخة

يا كنعان والله انوجع راسك كـَ رَاسْي

ياريت ترجع عهالموضوع وتعبي كـَراسي

بــ شواطي بحر شعرك أنا كـَ راسي

من دون مساعدتك رح تجرفني العبابْ

أمواجْ الْوَلْدَنِي كنعانْ مَا رِسِيلا
وأمطارْ الزَجَلْ صَوْبِي مَارْ سَيلا
العَتَابا لَهَا بِهَالصفحةْ مَارْسيلا
مارسيلْ غالي بَسْ صَعبْ الْطَلَبْ

COBRA الإثنين أبريل 13, 2009 6:45 pm

طول بالك

يا كنعان بيت عتابا اجانا كـَ مَرْمَرْ

مرمر فكري وكمان فكركـ مَرْمَرْ

واعتبرو ياخيي غريب وكـَ مَارْ مَرْ

من صوبنا ونحنا مو حاسبينلو حسابْ

**********

وين رايح

بعد ما شعرك بفكري عاش وكـَمَنْ فِي

وبعد ماقريت حكيك صرت كـَ مـَنْفي

أنا من دون شعرك وعتابك كـ مَنْ في

حروفو وشعرو بحّات وآهات التعبْ

COBRA الإثنين أبريل 13, 2009 10:08 pm

لـيـــــــــش

ليش يا مشرف مابتحققلي عَدَاله

حتى صارت العتابا منك عـِدا ليْ

ولما شفتني عنقود مستوي عَ داليه

ما قطفتني .. تركتني معرض للنهبْ

كنعان كنعان الثلاثاء أبريل 14, 2009 5:04 pm

مارسيل بحققلك العدالة وبرجع إذا بتقدر تشرحلي معنى هالبيت العتابا ورح أكتبو أول شي بدون تشكيل

أرض المكارم الفيها الكرم حل فيها
وأرض المكارم الفيها الكرم حل فيها
وأرض المكارم الفيها الكرم حل فيها
بتشرق شمسها عند الغيـــاب

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

COBRA الثلاثاء أبريل 14, 2009 7:50 pm

هههههههههههههههههه

خيي كنعان صار فيك متل الأصمعي

شو بيعرفني شو بيكون في بالك معاني انت وعم تكتب........

يازلمة 3 ابيات الن اكتر من 5 معاني

بس شفلي هيك مزبوطين..........

أرضْ المَكـَارم الفِيهَا الكَرَمْ حَلِّ فِيْهَا (حَلِّفِيْهَا)

وأرضْ المَكَارم الفِيهَا الكـَرَم حَلْ فِيْهَا

وأرض المَكَارم الفَيْهَا الكـَرَم حَلِّ فـَيْهَا

بتشرق شمسها عند الغيـــابْ

بدك اسا معاني في عندي بس انشالله تتطلع هيدي مزبوطة

كنعان كنعان الأربعاء أبريل 15, 2009 3:24 pm

صديقي مارسيل بيطلعلك 33 من 100 لأنك جاوبت على بيت صح من تلاتة هههههه
رح شكل واشرح

أرضْ المَكَارِمْ الْـفِيْهَا الْـكـَـرَمْ حَلّْ فِيْهَا
(الكـَرَمْ حَلّْ فِيْهَا ) = الجود انوجد فيها
أرض المكارم الفيها الْـكـَرَمْ حِلّْ فِيْهَا
(حِلّْ فِيْهَا ) = اسكن فيها
أرض المكارم الفيها الـكـَرْمْ حَلّْ فَيـّْهَا
(الـكـَرْمْ حَلّْ فَيـّْهَا ) البستان نشر فيء أشجارها
بتشرق شمسها عند الغياب

عتابا .......................

عتابا .......................

رد: عتابا .......................

رد: عتابا .......................

رد: عتابا .......................

رد: عتابا .......................

رد: عتابا .......................

رد: عتابا .......................

رد: عتابا .......................

رد: عتابا .......................

رد: عتابا .......................

رد: عتابا .......................

رد: عتابا .......................

رد: عتابا .......................

رد: عتابا .......................

رد: عتابا .......................

رد: عتابا .......................

رد: عتابا .......................

رد: عتابا .......................

رد: عتابا .......................

رد: عتابا .......................

رد: عتابا .......................

رد: عتابا .......................

رد: عتابا .......................

رد: عتابا .......................

رد: عتابا .......................