رد: شرفوا عالموشح يا شعراء

magdeeb الخميس سبتمبر 11, 2008 3:34 pm

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

الضيعة بو سعد الطبيب --- وأدويتو العربية
يشخص أمراضك ويصيب--- بعلم ومصداقية
بيقلك بيض وحليب--- ولحسة عسل يومية
وكمشة زوفى يلا جيب--- تتطول معهم لعمار

كنعان كنعان الخميس سبتمبر 11, 2008 11:21 pm

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

عم أتـــفرج من بعيد ---- ع مجد وعلى الشاعر
خلوني حساباتي عيد ---- وأجّل جمـــعة لســافر
مجد حروفو عم بتزيد ---- وعم تحلى كلمة ظافر
الضيعة لبست توب جديد ---- وشافت حالا بالشعّار

كنعان كنعان الخميس سبتمبر 11, 2008 11:26 pm

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

ضيعتنا مرتع للحـب ---- يا محلى هاك المرتع
محبتنا جوات القــلب ---- من شرايينو عم تنبع
كل ما تلاقو بنت وشب ---- أصوات العشق منسمع
ياربي توفق يا رب ---- وتتعبى من الحب جرار

الشاعر الجمعة سبتمبر 12, 2008 5:29 pm

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

بلش قلبي يوجعني ---- من كلمة مجــــــد وكنعان
البحر بطل يوسعني ---- وماني رح كفي الشهران
ويلي مانو ســامعني ---- الغربة صعبة يا أخــوان
وحبيبي اللي ودعني ---- راجعلك ماتنام ســـــهار

الشاعر الجمعة سبتمبر 12, 2008 5:39 pm

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

يا ضيعتنا شو حلوي ------ بليلك ونهـــــــــــار
بنهارك تمرق حلوي ------ وعيونا قمـــــــــــار
وبليلــــك تعمل بلوي ------ بمرقة مشـــــــــوار
وقلبو هالعاشق ملوي ------ حواليهـــــــــا يغار

COBRA الجمعة سبتمبر 12, 2008 6:15 pm

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

شفت الكلمة الحلــوة................. اللـي بترد الروح
حكياتك مانون صدفة................ بيــــــداوا جروح
اسمعنا بدك تســــافر................ وكـم يوم بتروح
كنعان انت وطايــــر.................. قلبـــــــــي بينوح

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

ماحدا ببالي بــــــعدك................... كنعان كنعان
سهران وناطر وعـدك................ وشوقي بركان
وحتى ولو طوّل بـعدك ................بنسى النسيان
ما ممكن لاقي بـــعدك ................شاعر و انسان

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

بوجودك بالضيعة نابـت ................كومــــة أزهار
وشعرك بقلبي ثابـــــــت .................لوانطفت لقمار
سحرتني و براسي دارِت.............. من شعرك أفكار
متلك ما مرا جابِـــــــــت................ عطول الاعمــار

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

magdeeb الجمعة سبتمبر 12, 2008 8:03 pm

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

هالكوبرا شوقو بركان ------ يا ربي عيـــــــن
يطالع حمم ودخان------ يبيد ملاييــــــــــن
لما بيعلق بإنسان ------ صادق أميــــــــــن
يفجر حبو شكال لوان ------ ويعمل إعصار

كنعان كنعان السبت سبتمبر 13, 2008 12:44 am

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

كّلا يومين تلاتــة ---- منرحل ونروح
بترككن يا رفقاتي ---- وبترك هالروح
معكن حليت سهراتي ---- وطابت الجروح
في إلنا موعد آتـــي ---- والزمن دوّار

كوبرا خجلني ردّك ---- ردك عالراس
بتمنى إبقى حــدّك ---- يا أحلى نــاس
وسع السما ودّك ---- من أبو الياس
من بين صحابو عدّك---- ومن أهل الدار

بكرا برجع أحكيكن ---- من هالغربــه
انشلا تبقى لياليكن ---- مانا صعبـــه
بكل مودة بحييكــن ---- من كل قلبي
اليازدية أملا فيكن ---- صغار علكبار

COBRA السبت سبتمبر 13, 2008 11:49 pm

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

في شب بهالضيعة..........................الو طــــلة
طلة حلوة وجريئة..........................مو عغفلــة
حكياتو جوهر حساس......................بعطر الفلة
بيداوي قلوب الناس........................صغار كبار

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

وبهالفترة صاير شاعر.................كلو احساس
اسمو مجد والزائـــــر.................بيرفع الراس
ولمن عالارض يــناور.................بتدق جراس
جراس تحيي هالطايــر................ع الناس يغار
وضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

فيروز الأربعاء سبتمبر 17, 2008 11:24 pm

اسمحولي شارك ابداعكم

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

باحلى مسا مســــــينا ------------كل بنت وشــب
بالسهرة الحلوةمعـــنا-------------زهّر الحــــــب
من كل صوب تجمعنا-------------جوات القلـــب
نخلي السهر يجمعـــنا-------------بنــــــص الدار

جاي وبقلبي فرحــــة-------------فرحــــة ياريت
تضوو بعيوني شمعة-------------تنوّر هالبيـــــت
بموقعكم احلى جمعة-------------بالضيعة لقيـــت
فيروز بتهدي دمعـــة-------------بتملي جــــــرار

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

اختكم فيروز

magdeeb الخميس سبتمبر 18, 2008 12:24 am

من كلامك هالعسل ---- بتخيل فيض الجمال

الإيد الكتبت هالجمل---- رقتها فوق الخيال

الشعر عكتفك خصل---- والعين بسواد الليال

والوجه بدر اكتمل ---- والمشية مشية دلال

ما بيلبقلك الزعل ---- حاميكي رب الجلال

رح أكتبلك الغزل --- تنصير مضرب أمثال

وأقضي حياتي بالأمل --- أحلم بيوم الوصال

آسف لخروجي عن الموشح لدواعي الغزل
ولنا عودة

magdeeb الخميس سبتمبر 18, 2008 12:42 am

فيروز الكلك رقة--- نلتي الإعجاب
برحب فيكي بهالملقى--- والملقى طاب
منطمع نحنا بالرفقة--- وصف الأحباب
تحميكي العدرا ورفقا --- وكل الأبرار

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

كنعان كنعان الخميس سبتمبر 18, 2008 4:56 pm

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

طلت عالسهرة الليله ----- احــلى فيروز
بأزهارا تعبّي الكيله ----- وأزهارا كنوز
جايي تغني مقابيلي ----- وعليي تفـــوز
ميلي عالمسرح ميلي ----- وطفيلي النــار

لا تخلي عيونك تدمع ----- وانسي الأحزان
اللحظة الحلوة ما بترجع ----- بعمر الإنسـان
بدي ضحكاتك إسمع ----- وخلي كنعـــان
أشعارو ليكي تطلع ---- مليانه ســــرار

COBRA الجمعة سبتمبر 19, 2008 1:57 am

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

فيروز يل كلك رقـــــة .........وكلك احساس
سرقتيلي قلبي سرقة ......... من بين الناس
عطيتي للكلمة حقـــا ......... ودقيتي جراس
صار القب يعشقهـــا .........يالف اشعــــار

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

شرفتي اهلك وناســــــك ......... زينتــي الدار
كتبتي الكلمة باحساسك ......... صارت اشعار
تعطر شعرك بانفاســـك .........بزهر الغــــار
خليتي الورد الــ باســك ..........من حالو يغار

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

فيروز الخميس سبتمبر 25, 2008 6:22 pm

حللنا بين اروع النـــــــاس.....................................فافرح ياقلب انه القــدر
زينوا وجودنا بالالمـــــاس.....................................افرح لاجل اروع البشر
سقونا من اطيب كــــــاس.....................................ناس زينتنا باجمل زهــر
اسكنونا قلوبهم والاحساس.....................................فنمنا بين حروف الشعر
سحر اقلامهم ونـــــــــّاس.....................................والشعر بحروفكم تعطـر

مجد الغزل من تمك نزل عسل
ومن حكيك احمروا خدودي من الخجل

مشرف هالمنتدى الله يعطيك العافيه
قلمك وردة وكلماتك معطرة ودافية

ياكوبرا انا مو حرامية حتى اسرقلك قلبك انت عم تتهمني
حبيت رجع شي مقابيل اللي سرقتوه انتوا يا الغوالي مني
سرقتوا قلبي واحساسي ....وبطلب من الكل يسامحني
كلماتك حلوة ياكوبرا وشعرك فن......مات مقابلو فني

شكرا" للجميع

اختكم فيروز

COBRA الخميس أكتوبر 09, 2008 9:55 pm

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

غبت وطال غيابك ...............الك زمـــــــان
مجافا اهلك وحبابك ..............لاه يا كنعـــان
اشتقنا والله لكتابك...............ولشعر الفنــان
ارجاع لبين صحابك..............وحلي المشوار

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

معود كنت تحميها ...............بين الشبـــــاب
وباشعارك تغنيها................تملي الخــــواب
بدي رجع ماضيها...............وافتح البــــواب
كون لارضك حاميها............وانت المختار

يلا يا مجد ويا شاعر وسولي وصديق
والشباب اذا غاب كنعان لاسباب ما منعرفا مننساه

وبعدين منشو خايفين كلعة صار معنا

كنعان كنعان الجمعة أكتوبر 10, 2008 2:07 am

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

غبت وطولت عليكن ---- غصباَ عني
جايي الليلة لاقيكـــن ---- وبدي غني
رح ببقى أنــــا منكن ---- وانتو مني
انشالله تكون لياليكن ----- ملياني قمـار

كوبرا يا غالي عندي ---- مش رح انساك
كرمالك بخلي ردي ---- ينور سمــــاك
وببعت من عندي وردي ---- تعطر خدّاك
يا ريتك قاعد حـدي ---- نألف أشعـــار

بعتذر عن غيابي لظروف خاصة .

الشاعر الجمعة أكتوبر 10, 2008 8:52 pm

لعيونك كوبرا

ضيعتنا اللعم تتحلى ------ بعيون النــــــــاس

متل الصبية وأحلى ------ وأغلى من لمـــاس

أنا راجع حتى قلا------ أشــــــــتقنا للكـــاس

كاسك يا مجد وكوبرا------ وكنعان المختار
وكاسك ياسولي وصديق والشباب الشعار

magdeeb السبت أكتوبر 11, 2008 4:47 pm

ضيعتنا الله معهــــــا ---- ملياني سرار
سرار الحب بتجمعها ---- وبتملّي الدار

رجعت أيام التعب ---- والتصاميم
بصراحة هيدا السبب ---- الله العليم
لا تحطوا عليي العتب ---- وضعي أليم
بس ذكراكم بالقلب ----- يا أخوة كبار

DESPERADO الأحد أكتوبر 12, 2008 9:47 pm

ضيعتنا الله معها ................ ملياني سرار

سرار الحب بتجمعها ........... وبتملي الدار

اشتقنا والله للسهرة ........... ولعب الطرنيب

الضمنة النا والكسرة .......... كلو تعصيب

عكاسة العرق والهبرة ......... بجنب الحبيب

انشالله متزول بعمرا .......... ونرجع عالدار

تحية لجميع الشباب بالغربة ....الله يردكن بالسلامة

وللشباب الجامعيين .....الله يعطيكن العافية

mark الأحد أكتوبر 12, 2008 11:30 pm

شو القصة يا جاري والله صاير شاعر ومانا عارفين

الله يوفقك أنت وكل الشباب

DESPERADO الإثنين أكتوبر 13, 2008 9:31 pm

ضيعتنا الله معها ......... ملياني سرار

سرار الحب بتجمعها......... وبتملي الدار

حبك محفور بقلبي........... يا أم النور

حروفك بتنور دربي.......... حروفك من نور

وعنك ومارح تبعدني .......... لو حتى بحور

انشالله تدومي وتتهني........ اليازدية نار

الى احلى ضيعة في العالم .......( اليازدية )......

COBRA الإثنين أكتوبر 13, 2008 11:08 pm

ضيعتنا الله معها ......... ملياني سرار

سرار الحب بتجمعها......... وبتملي الدار

مشينا بهالضيعة سوية.............بظل الحب
نقعد بسوقا مســـــوية.............بنص الدرب
ونسهر فيها ليليــــة..........ويحلالا هالقلب
شباب الجامعة المنفية.............ناطرين عنار

ضيعتنا الله معها ......... ملياني سرار

سرار الحب بتجمعها......... وبتملي الدار

رحنا مرة صبحية..............نقعد بالسوق
متّة علاء يوميـــة.............نشرب وندوق
كلمة ونكتة وغنية............والسوق معجوق
جاب رودي الكسرية..............وضربان تذكار

BOSS الثلاثاء أكتوبر 14, 2008 3:24 pm

كلامك رائع شعرك اجمل لهضيعة

شكرا لهلكلام الرائع

Souli...Y,M... الثلاثاء أكتوبر 14, 2008 5:22 pm

ضيعتنا الله معها ......... ملياني سرار

سرار الحب بتجمعها......... وبتملي الدار
عصدري ضمك ضمّة......تالحب يدوب
ومن خدّك اسرق شمّة......خاطي ومابتوب
وازرع عشفافك بسمة.......وشقشق هالثوب
وعزندي تغفى النجمة.......وياقلبي سهار