طريق حياتك

اعتقد ان اغلبيتنا (اذا لم يكن جميعنا) اختاروا مهنتهم او فرع دراستهم بناء على مجموعهم في الثانوية العامة (يعني مجبرين بسبب المجموع وليس لانو احنا اخترنا او نريد ذلك)

احب انا اسال الجميع

اين هو كل واحد منا الان بالنسبة لمهنته؟ هل انت راضي عن ما تفعله الان؟ ام انك نادم على اختيارك؟
وكمهنة فرضت عليك, هل حققت ذاتك فيها ام لا؟ هل تحاول على الاقل؟ ام هي مهنة لكسب لقمة العيش و خلص؟

ما الاهم برايك؟ ان تعمل ما تحب؟؟؟؟؟؟؟؟؟؟؟ او تحب ما تعمل؟؟؟؟؟؟؟؟؟؟؟؟
و السؤال المهم هو: لو لم تكن الان ما انت عليه, ماذا احببت ان تكون في الماضي؟ و هل تغير رايك الان و ماذا تحب ان تكون الان؟؟؟؟؟؟؟؟؟؟

ارجو من الجميع المشاركة
و شكرا

موضوع كتير حلو اللي طرحتو يا دشي

بالنسبة الي بعتبر حالي ما حققت حلمي اللي كنت بحلم فيه يمكن اول شي بسبب مجموعي بالباكلوريا

وتاني شي لانو للاسف بسوريا ما ما في هيك اختصاص او انا ما كنت بعرف انو في

لذللك وقت قررت اني ادرس فندقي كان هيدا جزء من حلمي , اني اجي عالامارات واخذ خبرة كبيرة منشان وصل لهدفي

بالنهاية بعتبر انو المهنة اللي انا فيا هلق ما كتير فرضت عليي بكل معنى الكلمة اذا فينا نقول يعني

هلق ايو احسن ان تحب ما تعمل او ان تعمل ما تحب براي الاتنين مهمين لانو الواحد اهم شي انو يحب المهنة اللي عم يشتغل فيا لانو اذا ما حب المهنة ما رح ينجح فيا بالمرة

كمان بظن انو بشكل طبيعي الانسان وقت بنكون الظروف مواتية انو يشتغل الشغلة اللي هوي بحبا

هلق انا متل ما قلت قبل انو المهنة اللي انا فيا هلق هيي الطريق لحتى حقق حلمي

وشكرا كتير على هالموضوع الحلو

بصراحة أنا ما اخترت مجال دراستي بناء على رغبتي بل مجبورة بسبب مجموعي اللي ما كان بيفرق عن الفرع اللي بحبو شي بسيط حالي حال كتيرين من الطلاب
على كل حال هيدي مشيئة الله وهو بيعرف مصلحتنا اكتر مننا ومتل مابيقولوا <يللي من الله ما احلاه >
بس نشكر الله حبيت الفرع كتير بعد ماكنت كرهانتو بأول الطريق لأن طلع كتير حلو وسلس وفيه معلومات كتير حلوة ومفيدة وكتير مجالات بالحياة ممكن ندخلها ونشتغل فيها من خلال هالفرع ونشكر الله مرة تانية لأن خلصت دراستي بأربع سنين وما رسبت ولا سنة وكله لان النجاح أنو تحب شو عم تعمل مش تعمل شو بتحب لان إذا بتحب شي ممكن شي تمارسه أو تتعرف عليه ماتحبه وتندم عليه
أما إذا حبيت الشي اللي عم تعمله اكيد رح تنجح لأن النجاح أساسه القناعة والإرتياح بالعمل
والحمدالله ماني ندمانة أني درست هالفرع وبالنسبة للمهنة مع أني اسا ما اشتغلت بس أكيد رح نقي مهنة انبسط فيها وكون مرتاحة
وبالنسبة لاخر سؤال إذا كتير ضروري أنو كون بالماضي وشو كنت بتمنى كون كنت كتير حابة أدرس صيدلة أو تربية مع انو التربية كانت أقل من التجارة بس ماكنت حاطتها بالمفاضلة قبلها
وشكرا عماد عالموضوع
ليش ما جاوبت انت ؟؟؟

منجاوب يا ستي, ما في مشكلة, بس كنت حابب شوف ارائكون بالاول
على كل, بالنسبة للمهنة اللي انا فيها هلق تختلف كتير عن المهنة اللي دخلت عالجامعة لدراستها

متل ما بتعرفوا, انا دارس تمريض
طبعا في كتير ناس عارضت هالامر, اولهم كانت امي
انا فتت طبعا مجبرا بعلامتي

بس بعدين قلت اوكي, اذا مهنة التمريض بسوريا مستقبلها مو كويس, فخلينا شدا شوي و كفي دراسات عليا بحيث صير دكتور بالجامعة, و هيك فيني حقق شي انا بدي ياه, الا و هو التدريس, و بالفعل, و الحمد الله صرت بنص الطريق حاليا
انا بحب التدريس كتير, بحب اتعامل مع الطلبة
بتعرفي يا Niro وين اكتشفت هالشي؟؟؟؟؟؟؟؟؟؟؟؟؟؟؟؟؟؟؟
بالكنيسة, من ايام مدارس الاحد و المدارس الصيفية اللي كنا نعملها للاولاد, اكتسف اني بحب هالشي

واعتقد انو انا قدرت حققت حالي بهالمجال, الحمد الله هلق اخدت الماجستير بدرجة امتياز, و ان شاء الله رح تابع الدكتوراه قريبا
تجربة العطاء بالفعل تجربة جدا رائعة, مهما كان نوعه, حتى لو معلومة
احس نفسي ناجح جدا في التعامل مع الطلبة

في الماضي......... و قبل دراسة التمريض, كنت حابب ادرس طب اسنان
اما الان, فانا بالفعل احب ما انا اعمله في الوقت الحالي
اما عن مهنة كنت بحب ان اعملها لو كان صرلي الظروف الملائمة

لا تتفاجأوا



الرقص.................... كما في فرقة "انانا" او "كراكلا", ما يروح فكركون لبعيد هههههههههههههههههههههه
و شكرا

والله ياخيي دشي لا تزعل مني بس انا برأيي انو ما في حدا اختار دراستو او أي فرع بالجامعة مثل ما هوي بيحب يعني بتلاقي الواحد مسجل فرع امنيح بس لانو مجموعو عالي مع انو بيحب يسجل فرع اخف او الواحد مسجل فرع بسيط لان مجموعو ضعيف وهوي كان بيحب يسجل فرع امنيح واحسن
وبالنهاية نحنا مرقنا وخلصنا والعترة علّي ميقدم الان وعلى اولادنا بالمستقبل

يا بيدو
مالموضوع كلو على هيدي النقطة, انو ما حدا اختار دراستو بايدو
رجاع اقرا الموضوع منيح
انت ما حكيت شي جديد, بتمنى انو ترجع و تعلق عالموضوع كجوابا عليه, مو تعليقا و ردا عليه
و شكرا

انا بالنسبة الي
العمارة كانت رغبتي من زمان وسعيت اني حصلها والحمدلله حققتها
ومع مرور الايام والسنين تأكدت من صحة خياري وميلي نحو هذا الفرع
الممتع المميز
التميز اللي فيه انو الشخص قادر يشعر ويشوف نتاج دراستو وهوي طالب
وانو يشتغل باي مكتب هندسي متلو متل اي مهندس متخرج اذا ما كان احسن
وبتصور هيدي ميزة للعمارة

انشالله الطلاب الدارسين للباكلوريا السنة بيتوفقوا وبيحققو رغباتهم وميولهم

بالنسبة لطريق الحياة فهوي بايدنا بشكل عام طبعا بوجود الارادة الحقيقة بس يمكن نحنا وصغار بنتمنى نشتغل شي معين او حتى ندرس فرع معين بدون ما نعرف كتير اشياء عنه بس تأثرا بقدوة معينة او باراء الاهل او المجتمع تبعنا .

في نقطة تانية لازم نشير اليها عن الدراسة فدورها قليل شوي بالمهنة اللي منشتغلها لان السوق ما بيتحمل المتخرجين كلهن بينما في مجالات كتيرة فيها شغل بس ما في معاهد متخصصة لالها او حتى الاعداد الكامل بالفروع اللي موجودة حاليا وطبعا السبب اللي ذكرته و هوي العلامات الخيالية المطلوبة بالبكالوريا .
انا مثلا كنت بحب ادرس فرع بيخص الميديا بشكل عام بس المجال ما كتير في دراسة كويسة متخصصة بهالمجال وحتى سوق العمل ما كتير مزدهرة عندنا .
بس الموضوع ما خلص اذا ما اشتغلنا بالشغلة اللي منحبها يعني اكيد ممكن نلاقي شغلة تانية نحبها او تاهلنا للشغلة اللي منحبها والمهم الواحد يحب شغلته ويتعلمها قد ما بيقدر والطموح بيضل موجود .