مشكلة الزواج المختلط

مختلفو الدين لا تزوجهم المحاكم الروحية للطوائف المسيحية، ولا المحكمة المذهبية لطائفة الموحدين(الدروز)، وقانون الأحوال الشخصية الصادر عام 1953 يعتبر زواجهم باطل، المادة 48(زواج المسلمة بغير المسلم باطل).

فأي مصير يواجهون؟ وفي ظل أية قوانين؟ وماذا إن تعرضوا للمطاردة أو القتل؟.
القانون السوري ليس الوحيد الذي يمنع الزواج المختلط، فكل الدول العربية تمنعه، باستثناء تونس التي تعمل بقانون مدني موحد يطبق على الجميع، وأيضا تركيا كواحدة من الدول الإسلامية التي تعتمد الزواج المدني.
لذا يلجأ البعض إلى إشهار إسلامهم والزواج لدى المحاكم الشرعية، وقد قام بإجراء تغيير الدين 450 شخص في عام 2006 وفقاً لدائرة الشؤون المدنية بوزارة الداخلية.
لكن ماذا عن الذين رفضوا تغيير دينهم؟ كيف تتعامل معهم المحاكم؟ هل تشرعن زواجهم، أم أنهم سيواجهون أحكاما بالتفريق ويقعون في نزاعات قانونية تتعلق بالإرث وحضانة الأولاد وأي دين يتبعون..؟.
مشكلة ليست سهلة , فما الحل
ابدو اراءكم حول هذا الموضوع

هادا هوي الحل مش رح قول الوحيد, بس الامثل
على كل انا ما بعتقد انو في مشكلة انو الواحد يغير دينو اذا هوي مقتنع بهالشي
المشكلة يا زياد انو بلدنا مو تاركلنا الخيار
لذلك في ناس عم تغير عالورق بس

انا برأيي انو الموضوع غلط ومو لازم الواحد يغير دينو

فالدين امر مو نحنا خترناه بارادتنا يعني مو كل واحد منا نقى شو بدو يكون هالشي هبة من عند اللة

مو معقول نغيروا مشان اي حدا وحتى اذا حبيناه بحنون يعني مشان الحب الواحد بيتخلا عن هبة الله

(من احب انا او اما اكثر مني فلا يستحقني)

واليوم في كتير حروب بتصير مشان اثبات الدين

ونحنا المسيحية بالتحديد ما بيهمنا هالموضوع يعني اذا وحدة مسلمة تزوجت مسيحي بيعدموا

اما نحنا ازا شي واحد تزوج مسلمة قال بيزعلو وبيقولو خلص تبرينا منو وبعد يومين بيستقبلوه هوي وياها بالسلامات بالياعيني

هيدا الواقع بمجتمعنا ومع احترامنا لكل الاديان السماوية فكلنا منعبد رب واحد وإله واحد

الدين ليش هبة من عند الله.... نحن ناخذ الدين بالوراثة
انا ولدت لناس مسيحيين و تربيت كمسيحي بدون ان اعطي الخيار لاختار
و افرض انو بالفعل هو هبة من الله, فاذا باي دين انا بختارو بكون انا عم اخد هبة الله
و الاديان كلها بتبجل الله, و طالما انا عم اختار دين مو بعيد عن درب الله, فما في مشكلة ابدا
كمان دينك بيقلك تعاليم معينة, طالما انا عم نفذها و مش عم قصر, وين المشكلة؟

انا معك اذا خدت الدين بالوراثة طيب مو الله هوي يلي خلقنا بها العيلة

مو نحنا نقينا العيلة يلي بدنا ياها

ولو الله بدو يانا باي دين كان فيه يحطنا من الاول

وشكرا

معلش و بلا زعل يا سعد
هادا حكي مدارس احد انو الله خلقنا يهيدي العيلة
بتعرف في طائفة مسيحية بالعالم ما بتعمد رعاياها الا لبعد ما يصيروا عمرون 18 سنة
ع اساس انو هني بيشوفوا شو في بهالدني و بيختاروا, هل بدون يكونوا من هالطائفة او من من طائفة تانية, او حتى اذا بدون يكونو من هالدين او لا؟
انا مش عم شكك بالمسيحية ولا باي دين او طائفة
بس الله عطانا العقل تنفكر, و طالما انا عم عيش حياتي بس كمان عم ارضي الله, فشو بتفرق انا باي دين بكون او على اي دين بروح؟
الناس بمصر هون عم تقتل بعضها باسم الدين
انا رايي نترك هالناس تعمل اللي بدها ياه
و بالاخر في شخص رح يحاسبنا, مو احنا نحاسب

" لا تدينوا كيلا تدانوا" يا سعد
هادا بالانحيل
شكرا

الكلام الذي كتبتموه عن الزواج يعطي القارئ انطباعا بان الزواج
هو واحد في كل الأديان
الزواج في الإسلام هو عقد يبرم في المحكمة أو عند الشيخ
ويقوم من ملك العصمة بفك هذا العقد في الوقت الذي يحلو له
لذا كان الطلاق سهلا في الإسلام
أما في المسيحية فالزواج هو سر ونعمة إلهية يحصل عليها
المقترنين ليعيشا في حياة مثالها علاقة المسيح بالكنيسة
أي علاقة محبة وتضحية واستمرار
لذا كان الطلاق صعباً في المسيحية رغم التسهيلات الحاصلة اليوم
ولا اريد ان استفيض منشان ما ينزعج عماد من طول الموضوع
وهنا يتضح الفرق بين الدينين في فهم الزواج
هلق اذا بدك تقلي مين ميعيش هالحكي او ميطبقو ؟؟
صار هون موضوع تاني لاني ماحكي من جهة المبدأ
يعني انت كانسان مسيحي عشت الحد الادنى من مسيحيتك
وتربيت على الاسس المسيحية كيف بدك تقبل انو العلاقة بينك
وبين زوجتك تكون مجرد عقد ؟
بكتفي بهالقدر بس بدي اسال فكرت شي باولادك على أي ثقافة بدن
يتربو او متل هالموضة الدارجة اليوم نحنا عند الكل ما عنا مشكلة
بتصور انو الانسان بدون هوية واضحة بيضيع
وبيصير متل لبنان اللي مش رح يصير دولة قبل ما يتفق اهله على تاريخ
ويصير ولائهم للبلد بس
انا اذاً ارفض الزواج المختلط في المبدأ و أستهجنه في الممارسة
وأما عن شغلة مدارس الأحد بتصور أنها المنهل الأول اللي بنشرب منو
المسيحية وبنعرف الرب الإله على بساطته ومحبته لأني فهمت منك
أنك مقتنع بغير هيك

لاه يا مجوضة, انا ما بنزعج من المواضيع الطويلة و خاصة مواضيعك يامعلم
و انت اكتر واحد ادرى انو عم اقرا كل المواضيع, انا عم احكي بشكل عام
على كل و رجوعا لموضوعنا
معك حق انو الزواج مختلف بالدينين, وانو مجرد عقد بين شخصين بالاسلام و علاقة محبة و تضحية بالمسيحية, و انو الطلاق اسهل بالسلام من المسيحية
و لكن..................................................
ما بدي احكيك على موضوع المبدا, بس هل بتعتقد انو تنين بالمسيحية تجوزوا و صارو على علاقة اللي انت عم تحكي عنها, بس بعد فترة بلشوا يعيشوا علاقات تانية, برة الزواج, و كلنا منعرف انو هالموضوع بيصير كتير
اساك فيك تسميها علاقة مسيحية؟
يا مجوضة, العلاقة بين تنين ما بيحددا دين, ولا بيحددا زواج, ولا بيحددا عقد, ولا بتحددا كنيسة
العلاقة بين اي شخصين هني اللي بيحددوها, و بس
شو رايك بالناس الاوربيين اللي عايشين مع بعض بدون زواج, باللي بيسموه هلق "مساكنة"
في منون ناس عيشين علاقة هالمحبة و هالتضحية هيدي اللي عم تقول عنها بدون زواج ولا كنيسة ولا مسجد ولا عقد ولا شي
هني بين بعضون التزموا بشي هني بدون ياه, و مشوا بعلاقة
بدك تقلي انو ما في شي بيلزمون لبعدين انو يضلوا مع بعض؟ كمان بالزواج ما في شي بيلزم شخصين يضلوا مع بعض
بدك تقلي انو الزواج بالكنيسة و قدام الله و الناس بيلزمون, اوكي, بس اذا العلاقة بين هالشخصين تحولت لعلاقة شكلية, اي انو بس قدام الناس و بس, و بيناتون الموضوع منتهي و بس لانو الكنيسة لازمتون بالموضوع
انا رايي هادا شي غلط كبير
اي تنين يختلفوا, و اي تنين بيحقلون انو يعيشوا حياتون مهما كانت الظروف
و مشان كيف الاولاد بدون يتربوا؟ برجع و بقول طالما انا عم علمون اساسيات الدين, و كل الاديان بعتقد بتتوافق بالاساسيات ما بعتقد في مشكلة, مو ضوروي انو يكون بالاسم مسيحي او مسلم, المهم يكون عم ينفذ هالتعاليم و يرضي ربو. ياما في ناس ملحدين تربوا على انو ما في دين, و عندون مبادئ احسن بكتير من اللي تربوا ع اساس ديني
و شكرا يا مجوضة

شفت, انعديت منك, صرت عم اكتب كتير كمان ههههههههههههههههههه

عدنا......
يا عماد يا عيني
بالنسبة لأنو الزواج وين ما تم ما بيشكلك التزام أنا معك فيه
بس هيدا اذا ما كنت مسيحي حق او مسلم حق
وهون الفكرة اللي محاول وصلها
ان تكون صاحب هوية ملتزم بدينك فانت ملزم باللي بيحكيه هالدين
ومن خلالو بيضبط العلاقة بين الزوجين اللي تعاهدو على صون
الزواج بيوم الزفاف
فلما بتكون ضوابط الزواج المسيحي مختلفة عن ضوابط الزواج في الاسلام
بتصور صعب يجمع الزواج شخصين من دينين مختلفين الا اذا قررا مسبقا
ان يتبرأا من ضوابط الدينين وهنا الشر الاعظم
فاللي متقدمهم انت كمثال حضاري في المساكنة لهم مقابل لا يجب ان تغفل ذكره
في الغرب الذي انتج الحالتين ورعاهما الا وهي المساكنة بين الذكور يعني
علاقة الذكر بالذكر وهي موجودة في بريطانيا من خلال الطائفة الانكليكانية
لهيك غياب الدين عن العلاقة الزوجية هو الكفيل بان يفشلها كما ان وجود الدين
كضابط لهذه الحياة ليس شرطا كافيا لضمانها بل هو شرط لازم
والبكلوريا تبعك علمية يعني سامع بالشرط اللازم وغير الكافي

طيب بما انك طرحت موضوع المساكنة بين نفس الجنس (علاقة الذكر بذكر والانثى بانثى)
مع انو هادا موضوع تاني, ما الو علاقة بالزواج المختلط المطروح اساسا
بس هدول برة يا سيدي الكنيسة اللي انت عم تقول الواحد لازم يلتزم فيها عم تجوزون و كنسيا, مو بس الموضوع مسكانة, في منون عم يتجوزوا
هل هيدي علاقة كنسية قائمة على المحبة و التضحية و الالتزام؟؟؟؟؟؟؟؟؟؟ متل ما انت قلت
كمان انت فهمتني غلط, انا ما قلت الاتنين من غير دين بدون يتجوزوا لازم يتبروا من الدين و يصير في غياب للدين
لا
الدين تتوافر فيه 3 شروط اساسية: انو هناك اله واحد, و انو الاله موجود لخير كل الشعوب, و موضوع الثواب و العقاب بالاخرة
هيدي هي العناوين الرئيسية, و الباقي موضوع المحبة و السلام و التسامح........الخ, مواضيع جانبية و مع انو يتضمنها بند "موضوع الثواب و العقاب بالاخرة"
طالما انا او اي حدا ماشي على هيدي التعاليم كلا, وين المشكلة؟ يعني لازم يكون اسمي مسيحي او مسلم حتى بالاخير نال الثواب؟ طيب ما في كتير اديان تانية غير هدول؟ شو مصيرون انت برايك؟؟؟؟؟؟؟؟؟؟؟؟؟؟؟؟ و انت برايك ما بيعرفوا اصول يضبطوا الحياة تبعون و يضمنوها؟ و يا ترى ما بيعرفوا معنى الالتزام و التضحية و المحبة؟؟؟؟؟
كما قيل و اقول, الدين معاملة, مو ضروري تكون مسيحي او مسلم حتى الواحد يعرف اصول الدين و اصول العلاقة و الالتزام و المحبة و التضحية و التسامح و السلام و.........و.............و..........الخ

ناطر ردك مسيو
و يا ريت يكون في مشاركات اكتر تنعرف اراء اكتر عن هادا الموضوع

يا عماد يا عيني
مشكلتي معك بكل المواضيع انك بدك تكون مسيحي وما بدك
المسيحية لا تتجزأ يعني متل ما قلت بموضوع سابق الإيمان
هو واحد يعني ما فيك تاخد نص وتترك نص
ولما بتتسمى مسيحي لازم تلتزم بالأسرار والانجيل وغيرها
من الفروض اللي وضعها الدين وغير هيك انا ما فيني سميك مسيحي
يمكن ما تهمك القصة بس خبرني منشان ما رد بقى على نقاش عقيم
ومنشان الكنيسة الانكليكانية بالغرب سموها كنيسة متل ما سمو كتير
كنايس كلنا بنعرفها بس بيبقى السؤال وينها من المسيح
ومنشان الاديان التانية ريح بالك ربها ادرى فيها وهوي اللي بيهون
وبيحل مشكلة ثوابها وعقابها
خلينا نوقف هالنقاش لانو شايف ميتوجه لغير هدف الموضوع الاساسي
وننطر شي ادمي يرد ويحكيلنا عن رايو بالزواج المختلط
ونبطل بقى هالتصفح السلبي اللي شاركتني انت وحدك بالدعوة لنهايتو
واذا مفكر عندك خط انترنت سريع وحياتك لانطرك عالدعسة عالبريد
والاية والسوا .... ورد بسرعة 28 كيلو بايت

وقفنا النقاش العقيم تبعنا يا سيدي
بس ردا على انو ما فيك تسميني مسيحي اذا ما عملت اللي حكيت عنو..................مو مشكلة, المهم انا اعرف انا شو, مو انت

بس اما شو عليك طرقة عين يا مجوضة
طارت من عندك و وصلت لعندي
النت الو معطل هلق شي 5 ايام
ليك, و مو بس عندي, بمصر كلا تعطل النت, يعني طرقة عين انترناشيونال فيك تقول, عابرة للقارات

لا funny يا دشي



اشتقتلك كتير

هلق هادا اللي طلع معك؟ كنت عطينا رايك بالموضوع عالقليلة
يعني بما انو انحسبت عليك مشاركة بالموضوع
هلا غلا رفو
ولك وينك ولا؟
ما عم تبين بالمرة سالت لوسيان عنك, بس بتعرف خيك, ما فيك تاخد منو لا حق ولا باطل
و انا مشتقلك كتير

مرحبا شباب :

اسف بس بدي ارجع افتح الموضوع من جديد
وباختصار:
اول شي معقول لسانا عم نحكي مسلم او مسيحي
تاني شي انا برأيي شب كان او صبية إدا عاش مع الشخص اللي بيحبه ةبيرتاح معه مو افضل من الشخص اللي فرضه المجتمع والعادات والتقاليد
تالت شي انا مع الزواج المختلط ومع احترامي للشباب بس انا مع كل كلمة فالها خيي عماد
وبعدين يا سعد المسيح لما قال (من احب ابا او اما اكثر مني فلا يحبني ) اكيد مش قصده المعنى الحرفي اللي تمثلت فيه انت وإلا المسيح بيطلع أناني بهيدا الشكل صح . وأكيد هوي غير هيك
وبالنسبة لموضوع الهبة من عند الله بس يا ريت توضحلي شو قصدك فيا لانو ما فهمت الصراحة


[b]ان تاتي متاخرا خيرا من ان لا تاتي ابدا[/b]

هلا بفادي بعد غيبة اشتقنالك
ولك خيي في شي مليار مسيحي عالارض ومنن اكتر من النص صبايا
يعني بحسب علم الاحتمالات والاحصاء اللي درستو بالحادي عشر ادبي
في مجال كتير كبير للارتباط بوحدة منن يعني نقي واختار على مد عينك والنظر
يعني اذا ما كانت من الضيعة في المانيا رومانيا روسيا الحبشة اميركا البرازيل.......
ضاقت عينك على هالكم بنت من غير المسيحيين
وبالنسبة للمسيح وحياتك قاصدا
يعني اللي خلقك واعطاك القدرة على الشم والسمع والبصر و اللمس ......
والمعرفة والتميز .......
يعني بشكل مختصر اكتر من اي عطاء يمكن يقدمه انسان حتى الاب والام
اذا بدك تبديه عليه فانت ناكر للجميل وما بتستحقو
هلق يمكن هيدا خارج الموضوع بس حبيت وضح
وبتمنى ترجع تقرا الموضوع منيح وتجاوبني على الاسئلة اللي طرحتها على عماد
خليك معنا ولا تقطعنا كتير

اولا : بالنسبة لموضوع الزوج المختلط قانونيا :

ما أتى به قانون الاحوال الشخصية لعام 1953 له أسبابه و مبرراته المسمدة من واقع الحياة العملية و الاجتماعية في ذلك الوقت و قد يقول قائل :هذا كان في العام 1953 اما نحن الان في العام 2008 و هنالك الكثير من الأمور التي تغير ت ؟؟؟؟؟؟؟؟؟؟؟؟؟؟
أما أنا فيسرني أن أفيدكم علما بأنه صحيح بان كثير من المعطيات قد تغيرت من ذلك الوقت حتى الساعة
لكن الشيء الذي لايمكن أن يتغير هو العقيدة و أحب أن ألفت النظر بأن عنصر الإرث الديني في داخل كل منا
هو أكبر من أي أرث أنساني أخر هذا الإرث الذي راهن عليه الكثير من القادة و الزعماء الدينين و السياسيين
وبسببه افتعلت الحروب و أزهقت الأرواح و سنت القوانين الحافظة له هذه القوانين التي تختلف تبعا لتغير البنية الديموغرافية للناس المقيمين في المناطق الجغرافية للعالم و من الجدير بالذكر أن الدين و الشريعة هي أحد مصادر القانون الرئيسية .
ثانيا:
أما بالنسبة للزواج المختلط فهناك الكثير من علامات الاستفهام نتلوها بأسرع ما يمكن :
1-مما يشكو الزواج المسيحي و مما يشكو الزواج في الشريعة الإسلامية و ذلك دون الدخول في مضامين و حيثيات و مفهوم الزواج في كلا الدينين حتى نسمح لأنفسنا بالقبول بالزواج المختلط و شرعتنه .
2-إن الزواج المختلط و المساكنة و غيرها من المفاهيم الحديثة الصنع و المستورة من منابع لا يخفى على أي مطلع أو مثقف أهدافها و غاياتها و التي تقوم على تدمير المبادئ و الأخلاق و إباحة المحظورات و إفساد الشعب تحت قناع الفكر و الحرية الإنسانية و التي تشكل جزء لا يتجزأ من المؤامرة العالمية لتحطيم العقائد الدينية و الأخلاقية عامة و الشرقية منها و لإزالة الضوابط الأخلاقية و الدينية التي يؤدي اعتناقها
و العمل بها بالشكل السليم إلى الارتقاء بالشعوب فهذه السياسة العالمية هدفها نشر الطوائف و البدع على حساب الدين و العقيدة الحقيقيين
3-أن الاختلاف بين أي شخصين ناضجين متحدين بعقد الزواج بمفهوميه الإسلامي و المسيحي و بغض النظر عن التفاصيل و الإساءة إلى هذه العلاقة الزوجية من قبل أي من الطرفين سواء كانت هذه الإساءة
جسدية أو معنوية فإن هذا الخلاف يرجع إلى عم مقدرة الشخصين على التفاهم و العيش ضمن إطار المؤسسة الزوجية و التي كان يجدر بهما التفكير مليا قبل الانخراط فيها و تحمل مسؤولياتها و ليس إلى فشل فكرة الزواج الديني
4-أما القول بأن لا يمكنني أن أجد من يناسب مشاعري و عواطفي و إحساسي إلا من خارج بيئتي الدينية
فقد يكون مقبولا عندما تكون بيئتك الدينية تتألف من شخصين إلى عشرة أشخاص يجب الاختيار من بينهم
اما عندما تكون بيئتي الدينية تشمل ملايين الملايين من الناس من مختلف بقاع العالم و من مختلف المستويات و الاتجاهات و انا غير قادر على الانسجام فهذا يعني أن المشكلة و مركب النقص موجود لدى الشخص نفسه
و ليس في البيئة المحيطة .فأنت لك الحرية أن تحب و تعشق من تشاء و كيفما تشاء من دون أن يكون ذلك سببا يؤدي الى تخليك عن عقيدتك الدينية و رسالتك الحضارية الدينية (علما أني هنا لا أدعو إلى الإباحية و التفلت و الحب و العشق من دون ضوابط او أخلاق) أما أذا أردت أن تتخلى عن عقيدتك الدينية لسبب يرجع إلى عدم قناعتك بها او بمفاهيمها او نتيجة لضعف أو عدم إيمانك بهذه العقيدة الذي يمكن أن يرجع الى بعض الممارسات الفردية من قبل بعض المعنيين بهذه العقيدة او الى قلة الاطلاع الديني و المعرفة الوثيقة بجوهر الايمان الديني فهذا موضوع اخر و لهذا الانسان الحرية في ان يعتنق ما يشاء لكن عليه قبل أن يقدم على فعلته هذه أن يفكر بعواقب تصرفه و نتيجة عمله التي يمكن أن يدفعها ليس هو فقط و إنما أقربائه و أولاده و أحفاده إالى ما شاء اللهو تاريخنا الاجتماعي لمن يحب أن يقرأ و يعلم مليء بهذه القصص و المواعظ .
أخيرا أتمنى من الجميع أن لا ينساق خلف كل ما هو جديد و مبتدع و ان يحصن نفسه بالعقيدة الصحيحة و ان يلتزم المبادئ الاجتماعية و الأخلاقية و الدينية الجملية و ان لا يكون من حيث لا يدري جزءا من مخطط الشر في العالم و الذي له من يموله و يغذيه بالافكار و الاموال و البرامج الاعلامية للوصول الى الهدف المنشود و الذي هو انحلال و إفساد و تحطيم عقائد الشعوب و الشعوب ذات العقيدة الدينية و الاخلاقية و التي مهما تشوهت و مهما تبدلت تبقى رصيدا لا يجوز التخلي عنه مقابل بعض الافكار المسيسة و ذات الاهداف المشبوهة.
و شكرا

على راسي يا خيي فادي
عجبني حكيك عن فرض المجتمع للعادات و التقاليد...............كفو
بس مين بدك يوضحلك موضوع الهبة من عند الله؟ انا ولا سعد؟

انا هيك صرت
يا خيي, قصرولنا المشاركة شوي
او حطوها على كذا مرحلة
بدي ضل نق على هالنقطة

يا شباب:
أنا رأيي وبكل بساطة انو خيي وين المشكلة إدا تزوجت البنت اللي بحبها وبتفاهم معها سواء كانت مسلمة أو يهودية
لأانه من اهم اسس الزواج التفاهم ,يهودية مسلمة كانك عم تحكي بيضا ولا سمرا
كل الديانات السماوية بتأمن بالله وبتعرف انو هوي واحد في كل الاديان
وبعدين مش من المعقول أنو الله يعاقبنا لانه الواحد غير دينه

الزواج المختلط امر عادي جدا والصراحه يجب ان يكون هنالك قانون يسمح بذلك لان الانسان في النهاية سوف يتزوج الفتاة التي يحبها بغض النظر عن ديانتها ومع تطور الزمن سنرى انها امر اقل من عادي

شكر لكل من شارك ومن لم يشارك في القاء الضوء على هذا الموضوع المهم
اعتقد ان المجتمع الذي نعيش فيه هو الذي يتحكم برأينا في هذا الموضوع
اعرضوا نفس الموضوع على انسان يعيش في الفاتيكان واخر يعيش في اوروبا او امريكا
لكان الفاتيكاني يعارض و بشدة الزواج المختلط بينما الاخر من مؤيديه ولا مشكلة لديه اطلاقا

للعمل نحو مجتمع افضل خالي من القيود
انا معارض ولا يمكن ان اتقبل الفكرة ,لا اعرف ان كان من الممكن ان اغير رايي في المستقبل

انا بعارض فكرة الزواج المختلط لان كل ديانة الها عادات وتقاليد ومعتقدات فاذا كان الاب من ديانة والام من اخرى الاولاد شي محلون من الاعراب على اي تعاليم بدهن يمشوا ؟ كيف اهلهن بدون يربوهن ؟ وعقولة الاخ مجد في كتير بنات مسيحية وما في اكتر منهن ومابيحلى بعينكن غير من غير المسيحيين هاد رأيي وكل واحد عنده رأيي وشكرا على هالمواضيع الحلوة

شو يعني نو في كتير بنات مسيحية ما حلي بعينكن غير من غير المسيحيين؟؟ او ضاقت عيني على هالكم وحدة مو مسيحية؟ شو الشغلة ضيقة عين؟
او يعني الواحد لازم يتطلع عالدين بعدين يحب و يتفاهم؟
افترض انا اتفاهمت مع بنت مسلمة اكتر؟ شو بيصير؟
ولووووووووووووووووووووه شو صعب هالامر؟؟؟؟؟؟؟؟؟؟؟؟؟؟؟

كمان جديد هيدا موضوع الاحتمالات بالزواج يا مجد, شو الشغلة بالقرعة؟؟؟؟؟؟؟؟؟؟؟؟؟؟؟؟؟؟؟
ماشي يا سيدي, بما انك حكيت عن الاحتمالات, رح خبرك احتمالات
في بالعالم 2 مليار مسيحي, و 1.4 مليار مسلم و الباقي اديان اخرى و ملحدين
يعني في تقول احتمال انو ارتبط بمسيحية تقريبا بيعادل احتمال ارتباطي بمسلمة, صح؟؟
هيدا بحسب علم الاحتمالات اللي اخدوه بالحادي عشر ادبي

كمان يا زياد صحي المجتمع بيتحكم بكتير امور, بس اذا دايما بدنا نرمي مشاكلنا عالمجتمع و منقول المجتمع و المجتمع ............ احنا شو دورنا؟
كلنا منقول المجتمع هيك, و المجتمع بيفرض, و المجتمع بيتحكم
اذا ما بلشنا احنا نغير, مين بدو يغير؟

دق المي مي