كنا صغار

كنعان كنعان الخميس أغسطس 27, 2009 11:19 am

كنا صغار

كنا صغار
وكانت صغيرة الدني
وكبرنا
وكبرت معنا الولدنه
العمر مشوار
بيمرق ع غفله
والزمن دوار
و ما إلو قفله
يا ريت لو بترجع
إيام الشيطنه
وإرجع صبي وترجعي طفله
وأخسر من عمري سنين
وكل ما خسرت سنه
أعطيكي سنه

بتتذكري ؟
ياما ورا الحيطان
كنا نلعب سوى
طيارة قصب
مع خيطان
نطيرها بمهب الهوى
وتركضي وأركض وراكي
وأقطفلك من حقلتي
ورده وسوسنه
بتتذكري ؟
ع كعب الشجرة العتيقه
شو حفرنا اسامينا
وبالذكريات الغميقه
شلحنا الهم ونسينا
وهلق كبرنا و تغيرنا
والشعر براسنا شاب
من خمر نضجنا سكرنا
وسكرنا عالماضي بواب
وبتضلها صغيرة هالدني

حتى لولا الضهر انحنى
وانكتب عوجوهنا
تعب الدروب
وتفاحنا صار بموسم جنى
وضعفت شمسنا
ومالت ع الغروب
الشجر كل ما حمل أكتر
كل ما غصونو عالأرض
بتنحني

كنعان الياس كنعان

magdeeb الخميس أغسطس 27, 2009 12:24 pm

مع أني بالفترة الماضية كنت مبسوط بوجودك وطلتك بالضيعة وبعرسك يلي فرحت اليازدية كلها فيه
مبسوط أكتر لعودة الحياة للمنتدى من خلال كلماتك الرائعة.
الله يا أبو الياس

Adon الجمعة سبتمبر 04, 2009 1:53 pm

صغار كنا ولازم نبقى صغار

ع باب العمر نبقى نعيش قمار

الاسامي المحفورة زهر وغار

ع اغصان الشجر ليل نهار

خلص العمر شو صرنا كبار؟

قلب الطفل يبقى دهر

ورد مزين روح الفجر

كنا صغار

كنا صغار

رد: كنا صغار

رد: كنا صغار