الحاضر والماضي

george salim shohakar الثلاثاء فبراير 17, 2009 4:53 pm

سافرنا نعمل شي قرشين......................ونعيش عيشة هنية

تنخلص من فكرة الدين...................اللي عيشتنا بعبودية

وتنعرف الحضارة لوين.................جرت بلادنا العربية

وسافرنا ع احلى بلدين.....................ابو ظبي ودبي الابية

و يا بيي شو يخزالعين......................ابراج كبيرة وعالية

يا جدي فلحت بحمارين....................تعى شوف التراكتورية

وياستي كيلوتك بشبرين....................كان بعزك وانت صبية

شوفي سترينغ بخيطين....................مركع تلات ارباع البشرية

اليوم الجسد كلو عريان.....................خربوا عاداتنا الاجنبية

الخشن و ناعم ويا عين.................. برغل جاهز للكبة النية

نقلات حطب وين ماكان.................وسواميك تعبانة محنية

بها الضيعة من ايام زمان................وما مننسى عس اليازدية

صبية حلوة طويل الفستان...............وجمال الخلقة الربانية

بكل خفة و رقة والحنان..................تنقل بجرار مليانة ميي

وحطب زيتون ورمان....... ........وشوية قمح ع الارض مدرية

من الغربة اناوالله التعبان.................ومشتاق لحارتنا الغربية

وحارة الشيف السرحان...................وبيوت الضهر العالية

وبكنيسة صلاة و رهبان..................وخوري وجمعة اخوية

وشجرة عتيقة من سنديان................بارض الكنيسة ع الزاوية

في جرن مي للعطشان..................حلوة ياناس الحارة الشرقية

وبحارة الحرش الامان......................مواقع حلوة حد البلدية

وزاروب بوعبدوا ودكان...............وصوت هناء تصرخ للختية

وعحجار مركبة جعيلتان...............وبوقدت حطب والنار هادية

وبلا عزيمة تتجمع الجيران.............صبايا ولاد واحلى ختيارية

خبزوزيت تملحو النسوان..................ويضيفوا الشباب بصينية

ويعبيء الجومعطر بالدخان...............دخنة حطب ريحتوا قوية

واخبار من سامر سليمان................اخبار وقصص من الاذقية

وسهة تمرق بقال فلان..................ها الخبزات ريحتهم شهية

سلق قمح بعد تنقي الزوان.................ومعبى بقفف ريحان بنية

اتخيلوا المنظر يااخوان..................الله ع ايامك يااحلى يازدية

اعذروا جورج ابو الان...................مقصر بالوصف شوية

محاولة فاشلة من george salim shohakar

samerbek الثلاثاء فبراير 17, 2009 5:42 pm

ولا يا بو جورج كفيت ووفيت
يسلم تمك ع هالحكيات شو حلوين
شكرا كتير الك ومنتمنى نضل نقرا هالحكي الحلو

كنعان كنعان الثلاثاء فبراير 17, 2009 8:28 pm

حب الضيعة ساكن فيك ----- حتى لولا رحت بعيد
بكــرا الحلــوة بتلاقـيك ----- وبتشبك إيدك بالإيــد
و هـَمّ الغـربة بتنسيــك ----- بتعيش العمر من جديد
حتى كل ما صاح الديك ----- تقول بحب اليازديـــة

الحاضر والماضي

الحاضر والماضي

الله الله

رد: الحاضر والماضي