الميلاد الاحلى

Adon الخميس ديسمبر 25, 2008 3:03 pm

انا بحب بالعيد بشكل عام انو اتمنى للناس انو يكون افضل بالسنة اللي جاي وانو يوصلو للاشياء اللي بدون ياها وبمعنى عام يكونوا اكتر فرح ,سعادة, رضى وقناعة
ولهيدا السبب رح اتمنى انو كلنا نكون احسن بالسنة اللي جاي كلنا نشوف شو الشي اللي بيخلينا اكتر فرح نتمعن بالاشياء وبحياتنا بفرحنا وتعاستنا حزننا والامنا ونحاول نعرف مصادرها
هيدا العيد تحديدا عيد الميلاد انا بشوفو عيد ميلاد كل شي منيح جواتنا:
ميلاد النظرة الايجابية اللي ما بتخلى من المنطق تقدير ومعرفة قيمة النعم اللي بحياتنا واللي مننسى ع طول قيمتها نتذكر قيمة الطبيعة الحلوة اللي عايشين فيها الفجر الغروب والمي نتذكر قيمة الاشخاص اللي بيحبونا من قلبهم ونعرف قيمتهن لان الاصدقاء الحقيقين هني من الشغلات القيمة والحقيقية بالحياة
ميلاد الفرح اللي بيغطي كل الحزن والقلق والالم اللي بعمرن ما بيفيدوا بل بيقتلوا الحياة الى غير رجعة كتير حلو نعيش لحظاتنا الحلوة وما نخلي الماضي يقتلنا بحكايات خلصت ولا الاوهام تاخد من درب متعتنا
"انظروا الى طيور السماء فهي لا تزرع ولا تحصد والرب يطعمها" .
ميلاد الحب اللي منشعر فيه من قلبنا لما منعرف حقيقة نفسنا منحبها بلمعنى الصحيح للكلمة ومنتمتع بالحب ننبسط لمن نعطي احيانا كلمة صباح الخير بابتسامة جميلة من قلب صافي تكون اكتر من كافية لتغير نهار انسان او كلمة طيبة تنقذ بشر ولازم ما نستهين بقيمة الكلمة
"احبوا بعضكم البعض كما انا احببتكم" .
ميلاد الروح اللي ما بتميز بين الناس لا دين ولا عقيدة ولا طايفة ولا لون عرق اوجنسية وبتعيش معهن بفرح وبدون ما تحاكم حدا منهن او تقرر مصيروا جنة كان او نار ونفهم انو ارائنا هيي نظرتنا للحياة وانو ممكن انو نكون على خطأ بكتير من افكارنا ونسمع الناس بكل اذان صاغية ونسمع افكارهم بحيادية قد ما منقدر ونشوف وين منتوافق قبل منشوف وين منختلف .
هيك انا بشوف عيد الميلاد واديش نحنا بحاجة لنخلق كل يوم وانو نحنا منخلق كل ما منكتشف شغلة غلط فينا و منصلحها.