طلاب جامعة تشرين x طلاب جامعة البعث ... وين الرجال للتحدي

magdeeb الجمعة نوفمبر 07, 2008 5:37 pm

أنا مجد ديب الناطق هنا باسم طلاب جامعة تشرين -اللاذقية أتحدى طلاب جامعة البعث - حمص بمناظرة شعرية
يمكن للمجموعتين الاستعانة بمن أرادوا من الشعراء الكبار في منتدى اليازدية أو أي شعراء آخرين للمساعدة في الردود
المعركة ستبدأ قريباً لذا حضروا كيبورداتكم للكتابة والحرب المفتوحة
الكلمات والأشعار الصادرة منا سوف تبدأ قريباً وصدقوني ستصلكم إلى حمص وإلى ما بعد ما بعد حمص

هههههههه مزحة بس حضروا حالكم للمنافسة

DESPERADO الجمعة نوفمبر 07, 2008 8:51 pm

نحنا جاهزين للتحدي باسم جميع الموجودين بجامعة البعث ............

وانا من اليوم رح حضر حالي للمنافسة ...........

بطلب مساعدة شاعرنا كنعان تيكون معنا بالمنافسة ضد جماعة تشرين

فراس السبت نوفمبر 08, 2008 1:59 am

نحنا جاهزين ولوو .. قدها وقدود
صحي أنا مو كتير بالشعر .. بس رح ساهم حتى ولو بتحميس وتشجيع لطلاب جامعة البعث

ويلااا study

DESPERADO السبت نوفمبر 08, 2008 7:34 pm

عراسي خيي فراس كفو والله ........

نحنا جاهزين ورح نشوفي جماعة تشرين شوفين الحماصنة يعملو

koko السبت نوفمبر 08, 2008 7:41 pm

لا لهون وصلت الشغلي مع جماعة تشرين انا من اليوم ورايح رح جهز حالي الكن يا شلة تشرين ...........

وانا كمان بطلب مساعدة كنعان ......
ورح نتواجه.....بالشعر

loooby السبت نوفمبر 08, 2008 7:49 pm

لا ولو جماعة حمص شيدّينا ملّا شوي.
يلا بسيطة .
في الميدان تكرم أو تهان .

كنعان كنعان السبت نوفمبر 08, 2008 8:07 pm

بين البعث وبين تشرين
علقت عركة تحـــــدي

سنوا عبعض سكاكيــن
وعالساحة جابوا العــدي

ويمكن رح تشعل تخمين
نار وما تعود تهـــــدي

طلبوا مني الحمصييـن
أوقف معهن بالـــــردي

ناطر من شلة تشرين
صوتا عحمص تودي

وبين الشدة وبين اللين
بدي أختـــار الشــــدة

وعاللادقية يا مساكين
جايي وجايب المهــدة

كسر روس المتل الطين
وحامل سيفي بيــدي

الله يستركن ويعيـــن
من هجماتي المرتدة

لاقوني وفرجوني مينِ
ردو من بعد ردي

DESPERADO السبت نوفمبر 08, 2008 8:56 pm

يسلم تمك يا كنعان والله كفو كل عمرك ...........

سماع هالمساندة ..........

من بعدك خيي كنعان
رح كمل انا هالغارة

من شعرك اسرق الحان
تضوي متل المنارة

نحنا حماصني وما مننهان
ومنربح بكل جــــــــــدارة

فنان بكــــــــــــل الازمان
وعراسي كل الحارة

ومع تشرين بالميدان
بدن نشعل هالنارة

كلمتنا سيف و سندان
بفعلا دايما هــدارة

روحوا حطو هالفنجان
ومعو شعلو سيجارة

نحنا الكن بكل زمان
شلتنا هيي الجبارة

COBRA الأحد نوفمبر 09, 2008 9:20 pm

على دلعـونا كيف بلشتوها

وعرفتونا منشعل ليش ولعتوها

بس اعرفوا كيف تحموها

واكتبو اغاني وشعر مزيونا

علـى دلعونـا ويا حبايبنـا

انتو جوهرنا وانتو دهبنا

رح من شجع اللي بيعجبنا

وانتو انقهروا ياللي تكرهونا

على دلعـونا من هـون ورايح

وحكي الاحبة بالعطر الفايح

بكرا عاللادقية ان كنت رايح

شباب حمص ما بيعرفونـا

شعب اللادقية قلي شو صابك

فتحت المعارك ع كل صحابك

بدك تتحدا وطولت غيابك

اصحوا بقا ليه بتنامونا

والله ياكنعان حكيك دابحني

وجاري علوش بـ قلبـي جارحني

بطلب من الكل انو يسامحني

انا حيادي بهالحرب الملعونا

يمه يا يمه مابدي جرب

بين اللادقية وحمص قرب

بفتح القبر ولحالي بسرب

لمن بتعلق مابيعرفونا

magdeeb الجمعة نوفمبر 14, 2008 12:03 am

عالهوارة الهوارة ---- ع حمص عملنا غارة
تاري نهار الأربعاء ---- قمنا قطعنا لزيارة

بتقضي سنة بالهم ---- تدرس وضعك والنية
أهلك ضلو يبقو دم ---- لينالوا هالهدية
واللقمة الصارت بالتم ---- وجهتها ع اللادقية
تشرين بحنانها أم ---- وهيي بلاد الحضارة

عالهوارة الهوارة ---- ع حمص عملنا غارة
تاري نهار الأربعاء ---- قمنا قطعنا لزيارة

ارتبط اسما بالنجاح ---- والمهنة وتحديد المصير
أفضل خيار متاح ---- والباقي كلو تعتير
ع غيرها ما حدا راح ---- إلا المقطوع الفقير
علامة قانون السماح---- بنفسو طبعت لخسارة

عالهوارة الهوارة ---- ع حمص عملنا غارة
تاري نهار الأربعاء ---- قمنا قطعنا لزيارة

التاريخ عنا عريق ---- الشباب بتشهد بالأمر
وابن اليازدية عتيق ---- فيها ينال يقدم فخر
من ربوعها شق الطريق ---- وكمل ربيعو بالزهر
والغافي من حلمو يفيق ---- رح نسمحلو بزيارة

عالهوارة الهوارة ----ع حمص عملنا غارة
تاري نهار الأربعاء ---- قمنا قطعنا لزيارة

بنسمحلو يزور اللفاح---- ويشبع شاورما ولحوم
بويزن للمعدة مفتاح ---- مسبحتو والله أطعوم
وريحة هالقرص اللي فاح---- العند بوجاك مدعوم
بنفخر قدام السياح ---- بتوتي فروتي من جعارة

عالهوارة الهوارة ---- ع حمص عملنا غارة
تاري نهار الأربعاء ---- قمنا قطعنا لزيارة

بنسمحلو يزور صلنفة ---- ويقضي وقتو بكسب
بتفضل فيها غرفة ---- ولا بغيرا قصور ودهب
غيرنا بدو الصرفة ---- بيسافر بدون سبب
وفيها رح بنقضي شهور ---- والقلب راضي ومسرور
وننزل على البربارة

عالهوارة الهوارة ---- ع حمص عملنا غارة
تاري نهار الأربعاء ---- قمنا قطعنا لزيارة

magdeeb الجمعة نوفمبر 14, 2008 12:07 am

مشكورين الشباب عالردود نحنا مفروض كنا نبدا بالشعر ونحدد النوع تبعو بس ظروف الدرس أخرتنا شوي

على كل حال كنعان منور الموضوع وأنا بقترح انو نسمح بكل انواع الشعر ....
الى القتال وخلينا ندوق الحماصنة طعم الهزيمة

فراس الجمعة نوفمبر 14, 2008 4:13 pm

شدو علينا الهجوم .. قال شو عم يتحدونا
بدنا انفرجيون بالضهر انجوم .. ويبطلوا إنون يجابهونا

بين الجامعتين علقت .. وحالفين يهزمونا
ولك لو طلعت ونزلت .. ما بيقدرو يوصلولنا

على دلعونا وعلى دلعونا .. قال علقت وجايين يتحدونا

على عيد البربارة جايين .. وبالساحة لاقونا
إذا مانكون منا خايفين .. فوجها لوجه نافسونا

حكا مجد وحكا مارسيل .. بس هدول ما بيخوفونا
على فنجان قهوة مع حب الهيل .. من خوفون بدون يعزمونا

على دلعونا وعلى دلعونا .. قال علقت وجايين يتحدونا

DESPERADO السبت نوفمبر 15, 2008 1:25 pm

عالهوارة الهــــوارة .............. اللادقية يا ختيارة

تعو زورونا بحمص ............. نمشوركم بالحضارة

لا بقا تقلي لفـــــــــاح ............ نحنا عنا تريو وبس

وبكريش بقعد مرتــاح ........... والباقي كلو خـــــس

من عنا الحلاوة بجبــــن ............ البقلاوة والنابلسيــــــة

وابو اللبن يفتح الفــــرن ............ تهف الريحة الشهيــــة

كل واحد فيكن بيجـــــن ............ من صبايا الحميديـــــة

نحنا صرنا ارقى مـــــن ............ وحيجي تقولو اللادقية

koko الأحد نوفمبر 16, 2008 1:21 am

ولك حمص يا عمي مالا متلان

وشمسها بالحضارة تبان

وللحلوين بالحمديية عنوان

وبارمن و باب سبيع و الدبلان

شباب اللاذقية انتو للفهم عنوان

من شان هيك امل الحقيقة تبان

انو اللادقية قدام حمص ما تبان

ان قارنتو بالكبر او عدد السكان

او قارنتو باكل او بالنسوان

يا اخواتي الكرامة و لا تشرين

الفرق واضح بالميدان

لك ولله صرعتونا بلاميركان

وهوي كلو على بعضو شارعان

اذا حسات في شي باللادقية حليان

ابدا لا تشغل الفكر و الوجدان

اكيد حدا من ياذداوية البعث بان
[size=18][/size]

كنعان كنعان الجمعة نوفمبر 21, 2008 12:17 pm

مــجد رح يدوقنا طـــــعم الهزيمــه -------- وحط حالو بهالعركة غريمــــي
من اللادقية صوتو عحمص وصـّلْ -------- انفجر عالعاصي و وَقــّع جريمــه
ما كنت بهالمعركة أنا بتــدخّــــــل ْ -------- لولا الحماصني طلبوا العزيمــه
وما دام الزجل بالــدم متـــــأصـّـــلْ --------- ان ما جري حالتو بعروقي أليمه
جيت عالساحة وحــــامل المـــنجـلْ ---------- احصد الغــّلــه تأعمل وليمـــه
يا مجد عن كنعان روح إســــــــألْ --------- وعن سحر كلماتي المعتزة الحكيمه
زرعت المنابر بحروف ما بتخجلْ ---------- بنهج القوافي وأوزاني السليمــــه
وما رح زيد أكتر أحسن ما تزعــلْ --------- و ردّاتي القاسية ما تعود تتحمــلْ
وتزول بيناتنا صداقتنا الحميمــــــه

مع حبي للطرفين

magdeeb الجمعة نوفمبر 21, 2008 8:57 pm

عالهوارة الهوارة ---- ع حمص عملنا غارة
تاري نهار الأربعاء ---- قمنا قطعنا لزيارة

يا خيي الضيعة زغيري----وأخبارا كتار
وأنا كرمال الجيرة ---- وحفظ الأسرار
مش رح أحكي عن غيري ---- وأفضح شو صار
بس الراحو على حمص ---شو حزنو وركبهم مغص
وسموا اللاذقية خسارة

عالهوارة الهوارة ---- ع حمص عملنا غارة
تاري نهار الأربعاء ---- قمنا قطعنا لزيارة

الحمصي بيطق بقهرو ----وحزنو بيعيش
تيتمشى مع حلوة ---- على الكورنيش
وبالــ(view) شي خلوة ----وكلمة تلطيش
بس الحسرة والبلوة----حمص أرضا صحارا

عالهوارة الهوارة ---- ع حمص عملنا غارة
تاري نهار الأربعاء ---- قمنا قطعنا لزيارة

نسمة كورنيش الغربي----بترد الروح
والزراعة بقلبي----عطرا بيفوح
الأمريكان اللي مخبي----جواتا جروح
الصبية الإلها حبي----القلب تشعلو نارة

عالهوارة الهوارة ---- ع حمص عملنا غارة
تاري نهار الأربعاء ---- قمنا قطعنا لزيارة

الحضارة بديت من هون----بأول لحروف
من شمرا لكل الكون---تمشي وتطوف
بس يا ندامة هالحروف---يلي خلت هالخاروف
يألف مواويل وأوف----ينكر فيها هالمعروف
ويهجي بلاد الحضارة

عالهوارة الهوارة ---- ع حمص عملنا غارة
تاري نهار الأربعاء ---- قمنا قطعنا لزيارة

أنتو بحمص بتجنوا ---- كل أربعاء
وهالصيت المافي منو---- عليكم بلاء
وذكرى أيوب الصابر ---- إلها وفاء
تحييها اللاذقية ----وتسهر حتى الصبحية
لتستقبل زوارا

عالهوارة الهوارة ---- ع حمص عملنا غارة
تاري نهار الأربعاء ---- قمنا قطعنا لزيارة

LOJAIN MOUSSA السبت نوفمبر 22, 2008 1:17 pm

انا ما بفهم بالشعر بس حابب رد على كرم و علاء باعتباري خريج قديم من جامعة تشريين و اللاذقية انو بعرف انو كنتو بتتمنو تتعلمو باللذقية بس المفاضلة شلفتكن عحمص

Souli...Y,M... الإثنين نوفمبر 24, 2008 2:52 pm

أحلى جمعة جمعتنا.....نحنا شباب الياذدية

تشرين هيي جامعتنا....وجينا تنصد الغارة

كل شئ من اسمه يبان.....لاتتعدو عالتاريخ
ستة تشرين و مجدا عنوان.....شبنا وعزّا مابيشيخ
حصدتو من حمص الزوان.....وشوية حب وزرنيخ
ولمى طحشتوا عالميدان.....رفعتو علم الخسارة

طلاب جامعة تشرين x طلاب جامعة البعث ... وين الرجال للتحدي

طلاب جامعة تشرين x طلاب جامعة البعث ... وين الرجال للتحدي

رد: طلاب جامعة تشرين x طلاب جامعة البعث ... وين الرجال للتحدي

رد: طلاب جامعة تشرين x طلاب جامعة البعث ... وين الرجال للتحدي

رد: طلاب جامعة تشرين x طلاب جامعة البعث ... وين الرجال للتحدي

رد: طلاب جامعة تشرين x طلاب جامعة البعث ... وين الرجال للتحدي

رد: طلاب جامعة تشرين x طلاب جامعة البعث ... وين الرجال للتحدي

رد: طلاب جامعة تشرين x طلاب جامعة البعث ... وين الرجال للتحدي

رد: طلاب جامعة تشرين x طلاب جامعة البعث ... وين الرجال للتحدي

رد: طلاب جامعة تشرين x طلاب جامعة البعث ... وين الرجال للتحدي

رد: طلاب جامعة تشرين x طلاب جامعة البعث ... وين الرجال للتحدي

رد: طلاب جامعة تشرين x طلاب جامعة البعث ... وين الرجال للتحدي

والله هادا إلي طلع معي يا شباب !

رد: طلاب جامعة تشرين x طلاب جامعة البعث ... وين الرجال للتحدي

رد: طلاب جامعة تشرين x طلاب جامعة البعث ... وين الرجال للتحدي

رد: طلاب جامعة تشرين x طلاب جامعة البعث ... وين الرجال للتحدي

رد: طلاب جامعة تشرين x طلاب جامعة البعث ... وين الرجال للتحدي

رد: طلاب جامعة تشرين x طلاب جامعة البعث ... وين الرجال للتحدي

رد: طلاب جامعة تشرين x طلاب جامعة البعث ... وين الرجال للتحدي