حفلات زجــل

كنعان كنعان الخميس فبراير 19, 2009 7:24 pm

أحبائي

حبيت انقلكن هالعركات الزجل اللي كانت بيني وبين بعض الشعراء
بتمنى تنال إعجابكن .

حفلة الزجل والردات الحلوة
اللي صارت سابقاً بيني وبين شاعرة الزجل المحترفة بديعة
طويلة شوي بس حلوة لأنو الموضوع بيحكي عن
( آدم و حواء )

كنعان

الله من بدء التكوين
وصّانا نحب الحلوين
ولم خلق آدم قلّو
حوّا قدامك بتلين

حوّا علينا شافت حالا
وصارت تتباها بجمالا
حطّت المرايه قبالا
ويا ربّي تستر وتعين

طعّمتنا هالتفاحه
وهيي كتير مرتاحه
والجنّة مع مفتاحا
بعبّا والله مخبايين

بديعة

يا حــــــوا يا أمورة يا انسانة
يا خابية خمر معتقة وعرقانة

لولا حلاكي ما خلق فنان
بهالكون ولا سمعنا غناني

ولا شفنا بالهوى قلب ولهان
ولا عيون من كتر السهر دبلانة

ولا شفنا عاشق من الحب سكران
ولا شفنا قلوب من العشق تعبانة

و يا بو الياس ان كنت زعلان
لا تظن مع حوا كتير فرقانة

عم تحكي كأنك متوّعك ومرضان
ودواك بزنود ناعمة ودفيانة

ورح تفهم عَ قد ما عندك ايمان
كنيستك مرا دايمة والخوري فاني

قصيدتك بتبقى عَ مرّ الزمان
والشاعر مات وعمرو عطاني

وبالتذكير اسمك يا آدم (مكان)
ومين أكبر (المكان) يمّا (المكانة)؟

حتى عاونك لقيتك كتير غلطان
المتلك يا بو الياس ما بتلبقلو إعانة

وبضلعو مرة تبرع آدم الانسان
وأنا من عندي بتبرع بضلع تاني

كنعان

يا بديعه ليش هالقدّ عمتعاني
ومن العشق قلبك عميرجف عيانه

لولا آدم..ما خلق انسان
بفضلو استمر الكون.. من جيل للتاني

وقلبك يا حوّا بيضل هيمان
وبتقضّي العمر من الشيب هربانه

ولمّا بتكبري وبيدور الزمان
وبتخلص من خابية خمرك القناني

بتصيري تقعدي بشهر نيسان
قبال الجمر وتقولي بردانه

والكنيسة .. فيها بيقعدو الرهبان
تايغفرو ذنوب مرا غلطاني

وقصيدة البيكتبها بو الياس كنعان
نسوان الدني بتركعلها تفاني

واسم آدم يا حلوتي (( زمان))
وانت بها الزمان شويّة ثواني

ولو تبرّعتي بضلع تالت كمان
بتبقي فضل آدم عليكي .. نسيانه

بديعة

من ديلة عنب هالخمر انعصر
ولولا الخابية ما كان انخمر

أنا ثواني وإذا شوي قَــلّوا
بيضيع زمانك وبيضيعو البشر

ويا يسوع لأبونا بو الياس قلّو
مين الما غلط تا يرميني بحجر

انا غيمة صغيرة والغيوم هلّو
تيسقوا هالأرض مي من المطر

أنا أخت والحنان من الأخت ملّوا
أنا أم وربنا فيها الكون اختصر

واذا ركعوا للقصيدة بيكونو تعلّوا
ومش الك يا حلو ... الركعة للعِـبَر

والعشاق كيف سهروا وتسلّوا
لو ما يشحد من الشمس نورو القمر

وحاجة على عبلة سيفك تسلّو
وعنتر القبلك كرمال عينيها انتصر

وإذا بتقرا التاريخ اللي بجلّو
لولا عشتار مافي حضارة ولا حضر

وإذا بتقرا يا أبونا الانجيل كلّو
بقصة مريم العدرا أم المسيح
بتشوف كم مرة يوسف النجار انذكر

كنعان

هيدي الداليه زرعها رجّــال
ومن مطرحا يا حلوتي الصخر شال

وسقاها دموع من عرقاتو
تاكبرت وصارت تطعم الأجيال

والغيمة لولا البحر وميّاتو
ما كانت تسكب دمعها عتلال

والّلي بيركعوا كرمال كلماتو
بيركعوا الو بكلّ اجلال

أنا سيفي تركتو بدمّــاتو
وبشقفة قلم عملت مـوّال

عنتر وعبلا يا بدّوعتي ماتو
وبعدنا منضرب فيهم الأمثال

ولولا قدموس يا بديعة بذاتو
يكشف حرف انكتب ونقال

ما كان شفتي الأنجيل وآياتو
وماكان دمع القلم عالورق سال

والمسيح انصلب وضحّى بحياتو
تايغفر خطيّة والذنب ينشال

الخطيّة لما كعي ابليس بحيلاتو
ودّاها مع حـوّا والحق ينقال

بديعة

بذات القافية ومن ذات المجال
رح جاوبو ع كل شي عندو سؤال

ويا حلوتي ارحمي هالقلب ودقاتو
وتركيني بحمرة شفافك ابدا الاحتلال

عطيتو مثل عن عنترة وحملاتو
صار يهجي عنتر ويهجي المثال

وشو نفع هالبحر لو ما موجاتو
بتلعّب صبية مسطحة فوق الرمال

وأوروبا بنت قدموس وكبيرة بناتو
لولاها ضاعت ابجديتك وضاع الخيال

ويسوع قبل ما ينصلب ع خشباتو
شوف كيف ع المجدلية أنهى الجدال

وبتالت يوم مين زارو من رفقاتو
وعملولو من الكفن للجسد شال

ويا ناس اذا بوالياس ما توفق بحماتو
مش حلوة بحق حوا يقطع هالوصال

وبالنسبة الي شي الف حوا هاتو
الكاس جاهز والليلة بعدا بأولاّ
وهاتو التفاح معكون ع كل حال

كنعان

حاجي بقــى بكــاسك العطــشان
تصبّــي تحدّي وتشربــي قنانــي

تعي تانسكّــر فوهة البركــــــان
القصّة يا بديعة مش كتير حرزانه

وكلّشي بها الدني تا يعمر البنيـان
ويلتم الشمل بضميــر انســـــانـي

لازم يجتمعوا عالحـــبّ و الايمــان
انثى وذكـر بشـــرع وجـــــــدانـــي

وبلا الانســـانه ما خلــق انســـــان
وبلا الانســـان هالعمـــر فــــاني

من هيك الخابيه من ماضي الزمان
بتتجوّز الخمر تا تخلّــف قنـــــانــــي

ولولا الخبز والخمره ما نصنع قربان
ولا نغفرت خطايا من جيل للتـــانـــي

ولولا السنه ما خلــق نيســـــــــــان
ولولا الليل هالعيــن نعســــــــــانه

وماكانت النار لولا حجــر صـــوّان
بليالي البرد لليوم شعـــلانـــــــــه

حاجي يا بديعــه تظلّمــي كنعــــان
اللي بيعرف التاريخ وبالأصل كنعاني

فضل حــوّا عراســي ومش نســيان
واللي بالغربه بيعرف قدّيش عمعاني

بديعة

ورود الحمر للسمرة بيقطفوها
ولولا محبوبتي ما بيزرعوها

وإذا بتسألوني بيكون ردي
صلبوني قبل ما يوم تزعلوها

وكل ما بشرب بعطش للتحدي
وللشعر قلامكون لو تتركوها

ويا بلابل عَ ضلوع الصدر هدي
والموهبة حبة حبة نقودوها

وتتسكر البركان وتقعد بحدي
تعلم القوافي كيف بيقصدوها

بركاني نار بكل شهقة ونهدة
وموهبتي مهما تركدو ما بتلحقوها

ومزالك ذكرت القناني بكل ردة
وعرفت مين امها ومينو ابوها

لا تقسى يا كنعان بكل شدة
عالعيون اللي للشاعر كحلوها

وشايفتك صرت تحكي بكل مودة
ونسيت هالحرب واللي بلشوها

وجوّزت الكل وماعدت عم تهدي
وناقصني تقول ستي لجدك جوزوها

ومزالك رايح ع ضيعتك عالمخدة
اللي من كفوف ام كنعان حيكوها

رح اعتبرك يا كنعان اجازة بهالمدة
سلّم عَ ضيعتك وعَ اهلا و بنوها

وبس ترجع منبدا عَ بعضا التعدي
وإذا غلطنا عذرونا وإذا ما سامحتوا
كنعان بديعة ما بترضى تسامحوها

كنعان

أوف أوف أوف أووووووووووووووف

الهيئة القضية بعدا بــأوّلا
بديعــه مش راضية صلح تعطيني
والحرب كرمال عينيكم جايي كمّــلا
وغير النصر ياناس ما بيرضيني
بعرف اٍلي بالشعر أكتر ما اٍلا
واٍن كان عكس هالحكي عالمنبر تلاقيني

رح ارجع رد عليكي
وارجع اهتـمّ
ومن ورده انزرعت ليكي
بقطف وبــشمّ

يا بديعة مانك قــدّي
لو سيفي انســلّ
زرعو كرمالك ورده
وزرعولي الفــــلّ
لو كنت بعمرو لجــدّي
جنبك ما بضــــلّ
ما حدا بيـقعـد حــدّي
غير بنــت العـمّ

عم بتقوليلي تعلّــم
قوافي الشعر
وانا اللي خــدّي علّم
ع كفوف الدهر
وقلم اللي طلّ وسلّم
ع سـطر وسـطر
بيكتب كلمه وما بيندم
ولا بيحمل هــمّ

ومين اللي قلّك اٍنّــي
وقّــفت الحرب
هيدي يا روحي هدنه
من فنون اللعب
وحتى المتلك يغلبني
يا حلوه صعـب
لازم شي قلعة يبني
وفيها يلتــمّ

ستّــك الله يخلّيها
لهاك الختيار
جدي ما بيرضى فيها
لو مهما صار
شبّهنالك تشبيــها
جــرّة فخّــار
واٍنت حطّيتي عليها
لحمات ودم

جيتي بـ نقطة ضعفي
زرعتي مسمار
و وقّفتيني عالحفّه
بين ميي ونــار
كل ما بســافر من غرفه
بهاك الدار
بقلب الطيّاره بصفّي
ابكي عالأم

تكرم عينك بديعه
سلامك نــور
رح سلّملك عالضيعه
وهاك التنّور
بس حميلي الزرّيعه
من هالقرقور
ورح قلك بالتوديعه
يسلم هالتــمّ

بديعة

اهلا وسهلا ومرحبتين
نورت المنبر كلـّو

يا شاري سيفك بالدين
وجايي هالسيف تسلـّو

بسيفك رح قصّك نصين
وعَ شرايينك رح دلـّو

يا تليميذي كيفلك عين
جاي الاستاذ تذلـّو

جايني يا غراب البين
وجيابي عصافير تملـّو

بفن ولعب وعالميلين
تفكيرك بدي شلـّو

والجرة الما عبتلك عين
أفكاري فيها تسلـّو

كلماتي يا عنب الزين
وشعرك حصرم ما حلـّو

وبنقطة ضعفك في ضعفين
وعقلك مانو بمحلـّو

وبكتب لعمّك سطرين
وعن تفكيرك رح قلـّو :

ما بيستاهل رمش العين
بدّو وحدة تسنبلـّو

للأسف لم نكملها حينها بسبب ظروف خاصة
أرجو أن تكون قد نالت إعجابكم

كنعان كنعان الخميس فبراير 19, 2009 7:37 pm

حفلة زجل بيني وبين الشاعر مازن مقدسي

( البحر والمطر )

مازن

أهلا بكنعان شاعرنا المقدّر ******** ضحكلك الزمان والبدر نوّر
رجعت بطلة حلوة نقيــــــــة ******** تا عباب هالبحـــــر تمخـــر
الوردات والزهور النديــــة ******** يــالي فيها عطري تصـــور
بجنينة هالوردات الجوريــة ******** مافي حدى بينازعك غيري
تا لمنتدى بصوتو يعلا ويكبر

بصفحتي أنــــــــــا رح رد هالردّة ********** جايــــي تباري وقبلان التحدّي
بحري أنا لو طافت مــــــــــواجـو *********** هدّي يا كينو ان قــــدرت تهدّي
شطي الرايق ان قصدت احراجو *********** عالدوحة بوصل المي من مدّي
بجمّع جيشي بكــــــــل أفواجـــــو ********** وعالساحـــة بنزّلو بكامل العدّي
الراعي البيدير بالو على نعاجو ********* ما بيهاب الدياب لو حـــان التحدي
وعنترة لو ما كان رايق مزاجو ********* عبلا ما كــــــــانت عندك عالمخدّة
وصبايا الحولك هاجو ومــــاجو ********** قبلك وزعو البوســـــات ع خدّي
جيتك تاخطف من بيتك ســراجو ********* تــا النور يشعشع بضــــو وردي
وان كانو كلماتك بهالمنتدى راجو ******** اسأل الشعار عن بحـــــر بيقولو
شاعر واخد الكلمات عن جدي

كنعان

يا بحر الهايج جيت بْلا عزيمه
حشرت حالك عطاولة الوليمـه

جايـــي تــهدد بـجزرك ومدّكْ
وْوَقّعتْ حالك هالوقعه الأليمـه

رح اقبلْ التحدي ومارحْ رِدّكْ
بْحيثْ سمــّيت حـــالك غَريمي

انْ هاجِتْ مواجك بترجع لعندكْ
وبتبقى الــدنيا منــكْ سليمــــــه

ماتنسى يوم اللي دفقت حـِــقدكْ
تسونامي كانتْ أكبرْ جريمـــــه

جايـــب معـك جــيش تَــيّرِدّكْ
جهّزْ حالكْ يا بحــرْ لَلْهزيمــــه

نعاجَكْ كلّنْ رح يوقفو ضدّكْ
راعي ختيار وما عندكْ عَزيمه

صبايا اللي وزّعو بوساتْ عَ خدّكْ
قبلْ ما تخلقْ كانـو من حَريــــمي

بحر يا آخِدْ الكلماتْ عـن جدّكْ
روح تعلّمْ نـــظمْ القـــــــــوافي
تا امنحكْ بالزجل من عندي قسيمه

مازن

ما بدي عزيمة تحتى ع بيتي فوت
وإن حليت مقامــي صـدور البيوت

أمّا لِ متلك يا كينو عالبيت متعدّي
لو كبر بيتك بيكون شبكة عنكبوت

كلماتي الّي ورثتها عن تمّ جـــــدّي
إن قصدتها شفت الدّر مع الياقوت

حلوة البتنام عشطي وبلفها بزندي
إن شفتها ريالك بيعبّي الشطــوط

وحريمك قبل ما يجوك إجو لعندي
تغزلو بجمالي تا الي متلك يموت

ولمّا مواجاتي تلاعب الجسم المندّي
بتصير زنودك عليهم بحكم تابوت

تمشو على رملي وفرشوه مخدّي
وع صوات فرحتهم صرت مبسوط

بترم الوغى يا كينو وحرب التعدّي
لو كنت فهمان مــا قربت ع مـــدّي
كنت ع بيتك فتت وسكرت الساقوط

كنعان

اسمعو يا شاهدين عَ بحر وكلامو
قال بصدر المجلس هوّي مقامـــو

وعم يتهمني إني اتعديت عالبيت
وبدو يخاصم ويطول بِ خِصامـــو

ما زالك يا بحر عالشعرافتريت
ولعنت بيّ الزجل عَ بيّ أقلامــو

لا تنسى يابحر اني موجك سقيت
وارويت الزرع من بعد صِيــامو

المطر أنا لولا غيومي ما تعبيت
ولا كانو الشقر عَ شطك بينامو

و لما بفصل الشتي عالخير هليت
صار شطكّ مزهــَــر و بِعزّ إيامو

بتوب أخضر الطبيعة أنا كسيت
و صار اللوز يلبس ويطول كمامو

ولولا دموعي ما تنهمل عالسكيت
ما كانت طافـــــــت مواجك يا بحر
وماكانو عَ صدرك الحلوين عامو

مازن

لا تشهِّد عَلَيِّ يا بو الياس حدا
إنتْ الشاهد والقصــــة بتشهدا

الشاعـــــر الفذّ ما بدو شهادي
كلماتــــي بتبقى عطول المــدا

عندي بالزجــــل أكبــــر إرادي
وكلماتك يا كينو مـــــا إلها صدا

غيومك وقت اللي نزلـــــو بوادي
عملــــــــــو نهر وع شطي اهتدا

ويا مطــــر لو تبرم كل الأراضي
بكـــــــرا لعندي بترجع عالهــــدا

رح اعتبرك يا مطر متــل أولادي
وسامح كلماتك إنْ كنت قاصــــــدا

بحيث البحــــــــــــر ما بوّس أيادي
ولا وطّى راســـــــــــو بعمرو لحدا

ولمّــــــــــــا عالمنبر بتقعد قصادي
بشعــــــــــــرك بتاكل نص الكلام
و بتفكر بحــــــــــــالك بعزيمة غدا

كنعان

بو الياس بلشت تخربط بالكلام
وعم ترجع بدل متمشي لقــدام

رفيع المستوى بالشعر حضرتي
وحضرتك مين ؟ يا عالي المقام

مـــــــازن فيك ما خابت نظرتي
بعدك زغيّـــر يا فــــرخ الحمــام

بترجف ان زأرت قبالك زأرتي
ما تظن الأسد بيحب الإبتســـام

يا تعلب بعد ما خلّص من أكلتي
بعزمك ع الغََدا تقرقش بالعضام

لمــا بالزجل أنا بكـــتب كلمتي
لحتى تفهمها بـدك مية عــــام

تعا لعنـــدي ت ناولك بَركـــتي
وبعدها صلّي وبلّش بالصـــيام

بلكي بلـــين وبمنــحك كرستي
وعصدرك للــزجل بعلق وسام

لكن مهما حاولـــت يا حسرتي
بتضلك طفــــل بقلب الســــرير
وماحـــان وقتك حتى للفطــــام

مازن

ن كنّك نسيت يا بو لياس الحقيقة
رح يكون ردي عليك بنفس الطريقة

عم شدّك بإدنك حتى رد النـــــــار
وما تحروقك نيرانــــــــي الصديقة

مقامي يا شاعر راسب بالاختبــــار
مـن التاج العلقتو ع روس الخليقة

تاجي يوم هجــــرتو ت الك صـــار
استحليتو إنت ومـــــا تركتو دقيقة

ليش يــــــا كنعان بتفكر بالانتصار
وتبين سنانك ل ضحكاتي الشفيقة

وتقول نظرتك كانت أحسن اختيـــار
أخــــــدتو بحياتك الحلوة والرقيقة

وهالتعلب الي كان عايش بالمـــــرار
مقاتـــــــــل سباع البلدان الشقيقة

ببيتك تحــــدّاك تا يـــــردّ الإعتبار
ويوقف بوّج الهجمات الطليقـــــة

بكلامو متصدّي وبجوابو قــــــــرار
شو عرفك انت ببحــــورو الغميقة

والحمام الي خرج عن الرف وطار
بعدو بيطير هوي ورفيقتو
مش متلك يا كينو قاعد بـــلا رفيقة

كنعان

بِعُمرو الخادِمْ ما لِبِسْ تاج أميرو
ملْتِهي بْرْغيفو تَ يِفرُشْ حَصيرو

ولا بْعُمرو مَلِكْ ساكِنْ بالقصورْ
تْنازَلْ عن عَرْشو تَ يهدي أجيرو

صَدّقْتْ حالَكْ زَغلولْ يا عَصفورْ
خفافيشْ الليلْ جنبَكْ عَمْ يطيرو

بْحَيثْ بيخافو مِنْ هَجْمَاتْ النُسورْ
بالليل بيظَْهَرو وبالنْهارْ بيـــغِيرو

واللي بيخافْ مِنْ مَنَاقيدْ الطُيـــورْ
مـِنْ رَعْبْْتو بيقْعُدْ يقرْمِطْْ بِضافيرو

لَوْ ما كنْتْ علَيكْ يا مازِنْ صَبورْ
وقلــبي كبيرْ وبتضــلك أســيرو

كنتْ من عيونَْكْ طفّيتْ هالــــنورْ
وخليتهنْ بعتْماتْ الليلْ يسْتَجيرو

لَكِنْ شوْ ما عملتْ يا صاحبي مَعْذورْ
عَ قــدْ عقلاتَكْ كلماتَكْ رح يصيرو

بَلا رفيقةْ عايشْ أنا ومِشْ مَقْهورْ
كلْ واحِدْ بيــحدِدْ بهالدنيا مَصيرو

و اللي بَدّها عَ كينو تلِفّْ وتْدُورْ
وتِسمعْ كلامْ الناسْ وتســتْعيرو

ما بيلبقلها تسكُنْ هالقلبْ الغَيُورْ
بيصيرْ هالقلبْ كلـّـوْ مــــنْ حَجَرْ
وبينساها وبيكونْ مرتاحْ ضَميرو

مازن

يا ابن خالتي لشعرك لازمك جمهور
والجمهور كله ورا أشعاري متخبي

ألحاني ناي من نـــــــار ومن نور
جايي حتى تحرقك حبّة ورا حبّة

شعوري ملك كلامي فلك وسرور
رمشي سبق عطري عبق بالغربة

لتوّقف قبالي لازمك تحني الضهور
وتصلي لشعري وما ترفع الرقبي

لأنك يوم خلقت جاحد متل كافور
شعرك ركيك متل سمينتو الصبّي

عا قد ماتكتب سطور وراها سطور
وسطورك تفضا و أوراقك تعبّي

و تمغمغ بشعرك وتهين الشعور
وتصدر أوامر ظلم وما حدا يلبّي

وتلفلف ع جبينك شالات وتدور
بيضلّو كم زر وانحطو ع القبّي

حاجه تأذي مسمعي وتكسّر بحور
للشعر وحدي انا الله خلقني
من إيام ما كتب القافية جدّي المتنبّي

كنعان

أوف أوف أوف

بيكَفّي بَقــى يا مـــــــازِنْ ثَرْثَرَهْ
بوجودَكْ صارِتْ الحَفْلِه مَسْخَرَهْ

وحقّْ العالي الخالِقْ هـَـالــدّْني
لَوْ كَرّرَتْ هالحَكي إيدَكْ بِكْسِرا

أنا كلّ ما بطَّلْتْ فيكْ إِعتِنـــــــي
متلْ بَعْرْ الجَمَــــــلْ بْتِرْجَعْ لَوَرا

شِعْرَكْ بَهْدَلي وكِلْماتَكْ وَلْدَنــي
والحرفْ عِنْدي بْيِسْوَى جَوْهَرَهْ

كِنْعانْ عُمْرو للأشعَارْ فِنِـــــــي
ولَمّا اللي مِتْلَكْ عالشِعْرْ افْـتَرَا

صارِتْ القافية بْأَبْشَعْ دَوْزَنِه
والأوْزانْ تْلَتّْ رْبَاعْهَا مْكسَّرا

طُولْ العُمْرْ قْبالي عَمْ تِنْـــحِني
متلْ ما بتنحني للزّلْمِه المَـــرَا

لَوْ ما كنتْ بْعَقْلِي يا مازنْ غَنِي
وبيقولو العَــفو عِنْدْ المَقْدَرَهْ

كنتْ قْتَلْتَكْ مِنْ شي سِنـِـــــــهْ
وْ حـَـدّْ المِتْنَبّي حفَرْتْ قَـَبْرَكْ
وْ زْرَعْتْ فِجْلاتي فَوقْ المَقْبَرَهْ

مازن

يا نـاري قيدي ويا أرضي إركــعي
وباب التحــــدّي من لهيبك شرّعي

دعيتك يا كنعان عَ معقل رجــــــال
وقت سمعت بإنـك شاعر ألمعـــــي

الظـــــــاهر تلتين الرجولة بالمثال
هيدي طباعك لكـــــن مش أطبعي

لمّا بطلّ عَ موقعي بسرعة غزال
لعندك رجعتــــي وكلماتي معـــي

نْ نسيت يا صاحبي وشم الخيال
لِ حضّرلك قصايد للرثا أصلا نعي

إن كنّك يا حطيئة رح تفتح قتال
لا حنظلة عمك ولا حتى الأصمعي

شعري بجمالو بيقهر ملوك الجمال
ملــــوك الشعر ما شفتها لا تدّعي

معي شو بتزرع رح تحصد غلال
مهمــــا حاولت أو جدّيت السعي

يا كينو أهلا فيك عَ ساحتي نزال
نكنّو مرورك ع معقلي بلا وعي

كان الوحي من كلمتي يشحد مقال
وبرجعتي رح أفرش طريقك بالقبور
وجروحك بملّحها بطارف إصبعي

كنعان

بين الشرق والغرب توزع كلامي
وتركــت بصمتي للمتلك علامــه

كتبت القصيدة تتـغازل المــوال
وبالشروقي بـديت قصـة غرامي

ولمـــا الـغزل للحلوين ينقـــال
بتصير الصبية بإيدك حمـــــــامه

الوشم اللي بيكون عجبين الخيال
ان غابت الشمس بتضيع الأسامي

بحيث قد ما طال خيال الجبـــــال
لما يحين العتم نعوض بالسلامه

خايف ما احصدك من بين الغـــلال
مع الشوك أحرقك وقضي وحــامي

الأصمعي وحطيئة اتكلو من أجيال
واتكل معهن عصر كان دامـــــــي

وبعدك عم تضرب فيهن الأمتـــال
خلي عندك يا شاعر كرامـــــــــه

ولا تقول فلان كتب وفلان قــال
خليك متلي يا مازن عصــــــامي

بجمع من عرق الجبين وبتعب مال
وما بتكل ع حدا وبعيش إيــــــامي

وانت يا بحر تا تكبر محــــــــال
بتضلك زغير بعيوني أنـــــــــــا
وما بتصير شاعر ليوم القيــــامه

مازن

مازال إحساسك بلش إنحـــــــدار
عادي إن فكرت الشعـــر خيــــار

غرامك يا صديقـــي فاقد رونقو
ولازمك توعــــى أو تاخد قرار

البحــــــر لا شفتو ولانك خالقو
متل ابني بالزجــــل منّك بختيار

توبي طرزتو من غربه لشارقو
شعري إن دام لا عيب ولا عار

وتوبك الغطاك من رقبتو خانقو
عيب تكــون بقلبو مستعـــــــــار

البحـــــــر الرزانــــة الله رازقو
بـــالزجــل مدوقك طعم المـرار

ن كنّـــك عصامي وجيبك فاتقو
ليش بيتك يــــا روحي بالأجار؟

شعــري لوما حضرتك عاشقو
وعلــى شوي رح تشيدلو مزار

ما كنت هنت للــــــوشم خافقو
وشو ما قلت تاركك .. قال المتل:
قلبي ع إبني وقلب ابني عالحجار

كنعان

قلبك عأبنك إي يسلم قلبك

الزجل يا صعلوك بدّو رجالو
بحر الشِعرْ شو سوّيتْ بِحَالو

صار منّكْ يصرَخْ ويتْوَسَّــلْ
بدّو تِعْتقو وتْفَكْفِكْ غْلالُـــو

هيئتكْ عَحالكْ ما عادْ تِخْجَلْ
و رَدَّكْ الأخيرْ تْخَطّى مَجَالُـو

العودْ بيــجودْ وبيصيرْ أجْمَلْ
لو لبسْ توبْ وشافْ حالُــــو

مشْ بالتوبْ الناسْ تِتْبَـجَّلْ
العقلْ زينةْ هيكْ قالُـــــــــو

ضرَبْني الزمانْ بسْ متْحَمَّلْ
مهما القدرْ طالْ بمَطـَــالُــو

القمحْ لولا ضَربةْ المَنْـــجَلْ
ماكانِتْ الناسْ تْلَمْلِمْ غْلالُـو

قاعِدْ بالأجَارْ ومِشْ مْعَجَّلْ
انقلْ عَقَصْري تَأنْهي عْمَالُو

أنا بعمرْ ابنكْ ؟ يا مْغَـفَّـلْ
بزيدكْ بالعمرْ ستْ سنينْ
ولا جِحي أكبرْ منْ خْوَالُــو

مازن

يا كاس الشعر بقدملك شفافي
سموك شفة يتيمة عا طرافي

واذا شفتي بشفتك ما تلاقوا
كينو مافيه يسكر من هفافي

عيوني متل موج البحر راقو
وهاج منك من دون استضافي

لأن ريحـــك ساعة انطلاقو
مــــــر متل العباية عا كتافي

اذا جرار القصايد ما انداقو
ونطروا بالكنيسة اعترافي

الآه شعري نْ ديقت خلاقو
بيقلك تا تتعلم الدوا الشافي

البحر لوّن ع كفوفي احتراقو
تعا إغرف حلا من احترافي

و ربيع العمر لحظة انعتاقو
شافك عريس واستلهم زفافي

وحديث الشعار في سياقو
دلق حالو بكتابي وغلافي

وصابيع الشعر كلما اشتاقو
يدوقو الطهر بيدوقو عفافي

الشاعر الفذ ما بيهجي رفاقو
ولا بيزعل بالشعر وبيجافي

وكنعان يوم الي طق معلاقو
رح يموت فقع يا اســــــافي

ما فيه يمّر بلحظة ع فراقو
ولا مرة فيه يعمّر هالوجود
بلا ما يدوق حبة من قطافي

هون خطيبة مازن اللي صارت مدامتو هلأ طلبت أنو نغير الموضوع من التحدي للزجل

كنعان

كْرَامِةْ يارا الْعَمْ تطلُبْ غـَــزَلْ
رَحْ وَقـّفْ حَربْ بعدو مااكتمَلْ

خَبّرْها مين الأشطَرْ بالغرامْ
ومين فنان بالضَمْ وبالقـُـبـَلْ

إلا عَ زنودي الحلوة ما بتنامْ
بْحَرْفـَني بغفّيها وبدوقْ العسَلْ

بطبَعْ عَ جبينها جَمري وِسَامْ
شَعْرْهَا بصابيعي حَريرْ انْغـَزَلْ

بغمزتي برميها بحبْ وهَيامْ
بشباكي بْصِيدْ درّغـَلّْ وحَجَلْ

معتّقْ أنا مــن مليون عــَامْ
منْ قَبْلْ التاريخْ وقَبْلْ الأزَلْ

بَحْـــرْ اللي بَعْدُو غرّْ يا حَرَامْ
ما بيعرِفْ يحكي ويْرَكّبْ جُمَلْ

بيكونْ بالدوحة بيقلّها بالشامْ
بيكونْ عالأرضْ بيقلها بزُحَلْ

ما بْيِفْهَمْ بالحُبّْ وْلا بالإنْسِجَامْ
مِتلْ صَحْرَاوي راكِبْ عَ جَمَـلْ

بَدَلْ ما يغازِلْ بْمَعْسولْ الكَلامْ
بيقضّي عُمرو بقتالْ وجَفـَــا
وبالحُبّْ بيصيرْ عاطِلْ عَنْ عَمَلْ

مازن

يا بنت الغـزل يا نورعيدي
خدّك خمرتي وشالك نبيدي

ما بيموج حلا نيسان أخضر
الا و ما لبسّك صورة جديدة

إنتــي اليوم ببحـــوري أخبـر
وبـــالليالي والإيــام السعيدي

يـــا بنت يا قمر زنبق مصوّر
سري دمك بشرياني ووريدي

عجبينك البــــدر لنورو دردر
بيسألك إطلبي شـــو بتريدي؟

تا شعشع خدّك بياقوت أحمر
متفتّح على إحساسي ونهيدي

لاتقبلي الا فارس شعر أسمر
تيطلب إيدك بليلـــــة سعيدة

وكنعان اليوم إعتقد وإتصور
بإنه الغزل مش طالع بإيدي

ليــالي قضّى المسكين المعتر
يدور عالحب برواية وجريدة

أمّا حروفي عاج فيروز ومرمر
وحروفه بتسوى بالغالي مجيدة

لانــــــــي شايفــو خيّــــال منبر
ولا نْ صهل مهرو بينده ياسيدي

بعرس الموهبة إحساسي زهّر
وعريس المنبر تلاقى بعروسو
شوقي الفارس وإنتي القصيدة

كنعان

مازالك بلشت تخربط مـــــعي
وما ضـــل براســك ذرة وعي

رح خبرك مين كنعان الـياس
االي قضى عمرو بجد وسعي

عندي قلـــب عاشق وحساس
بقلوب الصبايا بعدو موضعي

كلماتي ما بتنوزن بحجار ألماس
وحروفي بتقلا للشمس اطلــــعي

بالعشق ببني السهر عالساس
قمر نيسان عصوتي وعـــــي

لما بعشق ... بعشق بإخلاص
يا عيون بحر شوفي وقشعي

أنا الزير وحضرتو جسّــــاس
ورح قلا للمعركة اليوم اوسعي

تنشوف مين رح يكسر الراس
ومين رح يربح هالمعركـــــة
أنا يما اللي عامل حالو الأصمعي

مازن الياس مقدسي ( صديقي في الدوحة من صافيتا) .

كنعان كنعان الخميس فبراير 19, 2009 8:03 pm

حفلة زجل بيني وبين علي الحرك ( أبو الوفا )
أو السهر وردي

( التلج والنــار )

كنعان

كنت رايق وما حدى جوي معكر.....وتارك الافكار والنفس مرتاحة
إلا ويبعتلي عــــــــامر العسكر.....منهـــــن طـــاير ومنهن سباحة
ودالي خــــبر وتــــعب وتخصّـر.....ت نبلش عـــــركة فيها فصاحة
السهروردي او وردي الســـــهر.....المــــهم الورد بــــــزين الساحة
بس لما بيـــدبل ما بعـود اخضـر.....رح بعملو رمــــاد بنار قــــداحة
شعري بيحـــرق خيـــــــام عنتر.....وناري بتاكل نحـــــلات بالواحة
باعــتلي خــبرهــــيدا المــعــتــّر.....قال لا قيني ت نشـــوفك بالساحة
رح شوف ميـــن البيناتنا اشــعر......ورح خلي البشر عليه نــــّواحة
كلماتو تلـــــج مفــــتفت مكــّسـر.....وكلماتي نجمات بالسما وضّاحة
رح حط شعرو وعلـــــيه اســكر.....وخلــّي حوّى تحضـّــرالتــفــّـاحة
ولما عالــــتلج العـــــرق يتقـطر..... بيدوب متل ما يـدوب الســــكـّـــر
وما بيبقى غير ريحة العرق فواحة

أبو الوفا

كينو وقفوا مو الاكـــــتــــرية.........لما عرفـــــــوه ما بيقدر عليّي

وخافو اعليه ما يروح يـــوقع ........أسيري واطـــفي نارو الحـاميه

انا كتبت بقـــوافيه مشان يلمع........وحتى تبقى المعــــركة ودّيــــه

والقوافي ما بدها براءة مصنع ......ولا على اسمك مطــــوبه هيـي

شويعــــر زغير وعم يتمخلـع.......وجــــاي يحــتل قوافي الأبجديه

بيهددنا بناروا العم تلـــــــــسع.......قاسي و ما في بكـــلامو أريحيه

والنار جـــزاتك يا متقــــلـــّـع......مـــــــن جـــــنــّة رب البــــــريه

النمرود قبلك من الحطب جمّع......ت يحـــــرق الدعوة الإبراهيميه

خـــــزاه الباري و خلاه يركع...... ونارو صارت بـــاردة و طريه

بالتلج فــيروز إلها أحلى مطلع.......بتغني للصـفاء بكل حـب وحنيّه

والناركتيرة والناس منها بتفزع......و التلج بيجي صدفة بالشــــتويه

وكلشي كتير بيضــــــل رخيص......و القليـــــل أسعاره بتبقى غاليه

كنعان

لمـــــــــا الأكترية بتقول كلمتها ---------- صوت الأقلية بيصير يصغر
ولمـــــــــا النار بتزيد حدتــــها ---------- بتاكل اليابس مــــــع الأخضر
يا جاهل النـــــــــار كل قصتها ----------- بلشت من قدح صوان متحجر
ليــــــــالي العتم بالنور ضوتها ----------- وصرت تنام وبابك مســـــكر
وحوش الأرض عالغاب بعتتها ----------- أنــواري لما عالدرب تكـــــتر
نــــــار الحب لــــــــولا شعلتها ---------- كان الدم بالقــــــــلب بيتــخسّر
تلــــجاتك من كتر برودتـــــها ---------- بتحرم العشاق عالقمر تســـهر
والعاصفة من طيش شدتـــــها ----------- البيـــوت بتـــــخرب و بتدمر
والزرع من حقد وطـــــــــأتها ----------- بتدبل وراقو و بيصيريتـكسر
رح خلي ناري تزيد قوتـــــها ---------- وتمـــحيك من كل الدنـــــــي
وما يضل منك شي يذكر

أبو الوفا

يا كـيـنـو تـلـجـاتي مبـينزلوا .....ع نـــــارك ت يـتـبهـدلـوا

بـيـنـزلـواع الارض الســخية......ت يطلع فيها الـورد الحلو

بينزلوا متل خيطان حــريرية.....على عيون صبايا تكحلـوا

وبيبردوا الـوجنات الطـريـــة.....وبيحمروا من غيريخجلوا

والثلج بعز دين الشــــــتويــة......كل الـنــــاس بـتتـقـبـلـوا

والشب بيركد ورا الصـّــبية ......واللعـب بـالثـلج ماأجملـوا

أما اللعب بالنارالحــــامــيــة......بيتحروقوا زونـــد تفتــّلـوا

وحرارت الشمس الــعاليـــة....بتحرق الوجنات اللي تجملوا

ونارك يا كـــــينو قاســــيــة....وحّرها مـا في حـدا بيقـــبلوا

أما الـثـلـج يـا يا نور عينيـي.... مـنـشـتاق الــو بكل حـنــيـّة

وهوي عم ينزل الو روحانية....وكــــل العشــّاق بتتـــخايلو

كنعان

تلـــجك بي عز كوانين ------ سكّر عكل الطرقــــــات
وخلى الصبايا الحلوين ------ تتـحسر عالكــزدورات
حرقت بتلجك البساتين ------ بالوادي صارو الزرعات
لا بتحن ولا بتلــــــين ------ خربت الدنيي بالــبردات
شو صار لعقلك تخمين ------ العطف بقلبك ولّى ومات
ويا بو الوفا الله يعين -------- صوبي لا تقرب بالذات
ناري شرقت يا مسكين ------ وبدها تدَوّب هالتلجــات
شمسي ما بتشوفا العين ------ حتى تلــبس نضــارات
ناري لما الليل يحين ------- بتدفي ست الســـــتات
وبالصيفية بتاكل تين -------- وبتسرح بي هالحقلات
الفخار الأصلو من الطين ------ لولا شويو عالنـــارات
ما نزلت جـــرّة عالعين ------- تالحلوة تملّي الميـــات
ولما صبحية بتفيــــق --------- عناري تحط الأبريق
حتى تشرب هالمتّات

أبو الوفا

كنت بعرف واحد من الشّعـــار....... كانت تزيــّــن الــــــزاويه أنوارو

وكان دائما يهــــــددني بالنـّــار...... ويكــــتب ويحرقصــــنيي بأفكارو

مبعرف عالغيبة شواللي صـار........ وليــــش انقطـعت عنـّي اخبــارو

يمكن داخ والعـقل مّنو طــــــار....... لمــّــــا همدت وانطفت نـــــــارو

كان الجمربكانونــو قـــنطــــار....... داب الجمر وماضل غير شحوارو

يمكن يكــــــون غيّرالكـــــــــار.......والبغيّر كـــــارو بتخرب ديــــارو

ما عاد شفــت الو أشـــــــــــعار....... ولا حكــي ولا قـــّدم اعتـــــذارو

يمكن صار بالشعر ختيـــــــــار....... ونسي القوافي وعقلاتو طـــــارو

قديش بكي و بتلجاتي استــجـار....... لما تـــــشــلوط قلبو يا شحـــّــارو

يا شباب الامور لازمها دبـــّــار....... والكبــار لازم يضلـّــــوا كبـــــار

يا يرد عــــــالقصيدة بمقــــــدار........ اويتركوا الشـــــعر لاأهــــــلـــو

وكنعان يـــــروح يغيــّركارو

كنعان

هالوردة اللـــي هزيت غصــــونها ----- لبت الدعوة وفهمت المسألي
وإجت عالزاوية تنشر فنــــــــونها ----- لما صوتك بطلــبــها عِـــــلي
من وهجها رح تحرق البيــــخونها ----- واللي عالشعر عملو مرجلي
وحتى هالزاوية نبقى نصـــــــونها ------ لازم نوصلها لأعلى مرحـلي
في ناس الشعر بينبع من عيــــونها ----- متل بلـبل بيترغل ترغـــــلي
وفي ناس بتطـفلها و غيرة جـنونها ----- بهدلو القصيدة أبشع بــهدلي
بو الوفا يا قصيدة انسكر موزونها ------ ناري مــنك عم تغلــي غــلي
والمصلحة إلـــي وعلمتك تـــكونها ------ لا تتعدى يا شاعرعشغلة إلي

أبو الوفا

القصيدة حتى تعرف موزونها........بيلزمك يا شاعر تــــرّدا الي

تأوزلك كافها وعينها ونــونها........واحمي قوافيها من البهـــدلي

انا بحترم القصايد وبصونـهـا........واسمي ع متن الموهبة معتلي

بحكم ع كلماتها ولا بخـونــها.........وبغربل أشعارك غربـــــلــي

قصائدك قديمة ماتت فنونــها.........ماعاد بيطلعلك تعمل مرجلي

واشعاري بتضيع من دونــها.........وبيصعب عليك حل المسألي

يا بطيع معلمك ابو الـــوفـــا..........يا بيـــــتركك وحـــــّدك البلي

كنعان

كنعان إسمي من ماضي الزمــــان ---- جيت عالدني من زغرتي فـنان
والفن مكتوب بحــروف إســــــمي ---- رح قلك شو يعني اسم كنـــعان
ك: كاف كتابة زجل بدموع دمـــي ---- شعر وأصالة وللأدب عــــنوان
ن: والنون نايات صوتا متل هَمّـي ---- تعن عدروب الصبر والأيــمـان
ع: والعين عنفوان وصلابة وهِمّي ---- عين مليانة من مية الوجــدان
ا: ألف أحلام مرسومة بشي كلمـة ---- وطموح وعزيمة بتعمر البنيان
ن: والنون الأخيرة نار بتحمـــّـــي ---- تلج بو الوفا تايسيل بالوديـــان

أبو الوفا

...... كينو حروفك شاعلي النارفيها....... بكرى بتحترق والناس بتنسيها

.......لا تقول اسمــــك بالفن أنكتب ...... مبتعرف تكب قصيدة وتكفيـها

ك....كنايةالــصـــراحة هيدي لقب ...... الي ولا بــخاف مرة احكيـــها

ن ...نارك الشـــاعلي من الغضب ...... كل ما ارتفعت تلجي بيطفيــها

ع ...عيونك الناعيسي من التعــب ...... عاى صوت النايات بصـحيها

ا ....انا صــاحب الأصل والنسب ...... الصداقة ما بخونها ومبنسيــها

ن....ناحت روحــــــــك من سبب ...... أهات و نيران جوّتك مخبيــها

....حتى احرقت الخشب والحطب ..... ودنياتك أتركت الشــحوارفيها

......وشعلت البيادر والقــــصـــب ...... وبقايا نيرانك صـــارت سودا

.حتى نزل تلجي صار يغطيها

هون الردات التلاتة إلي
لأنو طول أبو الوفا حتى رد

كنعان

فكرت بتعرف انو الفرق كبير......بين الافنخار وشـــــــوفة الحال

طلعت ما عندك تميز وتــقدير......وبتشـوف الضبع وهوي غزال

يا تلج رح اجمعك تتصيرزغـير......وحطك متل ما انـــــت بالغربال

وبس تشرق شمســــي بكير......ما بيضل منك غير دمــــــع سال

ناري ضـــوت ليلك المـــــنير......تتشوف دربك وتشــوف الخيال

تعا تعــــلـّــم عند كينو الكبير......وشوف كيف بيكــــون الارتجال

متواضع انا لكن قدامك بصير......شوف حالي بســـــاحات القتال

يكون بعلمك انا الشاعرالامير......وانت مــــتلك مـــتل هالــرجال

كنعان

من موقعي رح رد عالبـــــهدلي.....اللي وجهتها يا شــاعــر الي
الزجــــــل بيقلك مـــــــين كنعان.....والشعر حطني بأعلى مـنزلي
لا تحكي عاللقب وانت خســران.....وعامل حالك عالكلمات ولــي
معـــروف مين بيـــناتنا غضبان.....وقـــلبو عــــم يغــــلي غـــلي
حسون عم تبكي عالاغصـــان......تعلم من البلبل كيف الترغلي
القوافي ما بكســـــرها يا فنــّان......زين كلماتك وشوف البهـدلي
ورجاع لعندي وتعــلـّـم الاوزان......وبعدين عمول عليي بو علي

كنعان

عالمنبر رح نتلاقـى-------- يا وردي بيــــك
ناري نار الحـــراقه -------- رح تقضي عليك

تلجك دايب ع حــلّو -------- بيــخــــــاف النار
جايي الاستاذ تـزلو -------- وحــــــامل منشار
تقطع ورداتو وفلـّو-------.- شــــــو عقلك طار
قلــو لتلـــجك قـــلو--------- النار حـــــــواليك

لما الحلوة تضحكلك --------- عحفاف المرج
بيولع بنــارا عقلـــك --------- والنــار تــــأج
ويإيدا لــــو تسكبلك --------- ميي عالـــــتلج
بنص دقيقة رح تهلك -------- من نار الفيــك

لما الشمس المـــحْمَرّا --------- بأنوارا تــهل
الناس بتطلع لــــــــبرا --------- عاسحرا تطل
و البـــنت الأم الــغّره --------- عالشط تحل
بترجع لونا مســمرّا ---------- بلون برونزيك

أبو الوفا

عالمنبر رح نتــــــــــلاقى..... ياكيــــــــنــوفيك
وتلجاتي هالبـــــــــــراقـة...... رح رشـّــا عليك

تلجي ابيض ع حـــلـــّــو....... وعندي إحســاس
حاشا الأستـــاذ نذلـــــّــو........ الحبـــــوه الناس
لكــــــــن ممــــنتنازلـــّـو ....... لا ابـــو اليـــاس
قلو لجمــــرك قلـــّــــــــو ....... جـــاي طفــّــيك

جاي طفيـــلك قلبــــــــك ........ من لهـــب النـار
نار اللي عملت دربــــك ........ صفوة وشحوا ر
وحياة العدرا وربـــــــك......... يا ابن الـــــــكار
بو الوفا لما حبـــــــــــك.......... مارخص فــيك

حاجي بنار الحــــــراقة ......... تهددني هيـــــك
خلي قلوب المشتــــــاقة ......... تطوف حواليـك
بعمل تلــــجاتي بـــــاقة ......... وبهديها ليـــــــك
خلـّي عندك لبــــــــــاقة ......... حتى راعيــــــك

هالبنت الحرقت وجـها ......... من حـر الشمـــس
صارت تلجاتي ترشها .......... ت يطرى اللمـس
مو حلو هيك تغــــشها .......... الحلوي بتــحـــس
بالفي صـارت تتمــشى .......... بالجكــرى فيــك

كنعان

لا تحشر اسمك بين أسامي الشعّار ------ بعدك يا أبو الوفا عالمنبر زغيـــر
غير بمطرحو ما انزرع مسمـــــار ------ وكل واحد ع كرستو بيعقد أمـــير
وين بدك تهرب من وهج هالنــار ------ وع أيّا سمـــا رح تقدر تطــــــــير
بتعرفني بداريك وبحبك يا ختيـار ------ وما بقسى عليك وفي عندي ضمير
بكاغيلك متل الولاد الزغـــــــــار ------ وبغنيلك ت تغفى عا حرف السـرير
طمعت بطيبتي والعقل منك طــار ------ وتلجك من ناري صار يستجـــــير
ضب كلاكيشك وتوجّه عالمطــار ----- وعأول طيـــارة سافر وطـــــــــــير
لعندي تعا وجيب من الورق قنطار ----- ت علّمك الزجـــل كيف بيصــــــير
بعدها بسمحلك تتعدى على الكـــار ----- وبضمّك لجوقتي تتعلّم الـــــردات
أحسنلك ما تبقى عند غيري أجير

أبو الوفا ( علي الحرك ) شاعر وصديق من مصياف .

(ضب كلاكيشك) : يعني احزم أمتعتك بلهجة منطقتنا

[/center]

حفلات زجــل

حفلات زجــل

بيني وبين مازن مقدسي

بيني وبين علي الحرك ( أبو الوفا)