تراث أو من التقاليد / خيمة الغار /هل أنقرضت ولماذا

مرحبا للجميع

يا جماعة أنا بدي أرجع للماضي القريب بالضيعة
من حوالي 12 سنة بتذكر بكل صيفية كانت ضيعتنا الحلوة تتزين بخيم الغار عالاسطوح كلها كان معظم بيوت الضيعة على كل سطح يعملو خيمة غار وتضل كل الصيف والشباب والصبايا يقضو فيها كل الاوقات ضهر ومسا وسهر للصبح
بس للأسف ماعد شفنا ولا خيمة وحدة بالضيعة
يا ترى شو الأسباب هل التطور والحضارة بيخلونا ننسى هالتقاليد الحلوة أو شغلنا ماعنا وقت فاضي لهيك شغلات
يا ريت تخبرونا رأيكن
ظافر

الشخص المميز لا يقدم إلا المواضيع المميزة
فعلاً موضوع مهم ولامس ودغدغ ذكريات ولحظات مهمة بحياة أهل الضيعة
بالنسبة إلي شخصياً كل سنة بقرر إنو أعمل خيمة غار بس لعدة اعتبارات ما بيظبط الأمر:
الوقت مشغول بالكامل لهيك بقول إنو اذا عملت الخيمة يا ترى في وقت اقعد فيها؟؟؟؟؟؟؟؟؟؟
السبب التاني إنو حياتنا ارتبطت بالتكنلوجيا بشكل كبير يعني إذا ما معي كمبيوتر محمول يوصل عالسطح بتصور ما رح اترك الديسكتوب وأقعد بالخيمة.
السبب التالت هوي وجود السد اللي عامل رطوبة فظيعة ما بتخفف الغارات من حدتها فالواحد بيفضل يقعد بجو فيه مكيف
ولا يطلع ينسلق عالسطح
والناس كمان صارت تفضل خيم القرميد اللي بتعطي جمالية لا يستهان بها بس طبعاً إذا قورنت بالغار ما في نسبة من ناحية البساطة والتراث
بس متل ما قلت فيه حرقة وتمني لو انو الواحد يقدر ينسى كل هالامور ويقعد بخيمته مرتاح ...جو غير شكل أوقات ما بتتعوض ............بس آآآآآآآآآآآآه الزمن بعمرو ما رجع لورا واللي بيروح ما عاد بيرجع

خيي ظفورة بتصور كمان وجود الدش عالسطح أخد محل خيمة الغار

اي ولله رجعنا عشر سنين لورا بعتقد هلق بالضيعة كلا ما في غير خيمتين غار على الاكتر ........
خي السبب هوي انو العالم صارت قليلة المروي مين بقا ينزل على الحرش ويجب غار و العدي بعدين صار في مكيفات وهل الشغلات ومتل مفال لوجين الدش هو كمان سبب اساسي.......
وشكرا على الموضوع الرائع

هلق صاروا بيقعدوا عالمكيف و التلفزيون و بيشربوا كابو تشينو مين بقا فيرق معو خيثمة الغار ولا كاسة الشاي

والله يا جماعة الفكرة تراثية (ضيعجية) من الطراز الاول مزروعة بماضي وفكر كل واحد منا ------ بس القصة ما بتنتهي عند الاسباب اللي زكرتوها وبس ------ اللي صاير انو بوقتنا الحالي اذا بتجمع كل الغار اللي بحرشنا ما بيكفو يعملو خيمتين ----- لانو احراشنا احراش سنديان ومن جهة تانية اللي كان عندو مقسم فيه غارة او غارتين شالون وعمر فوقهن بكل بساطة ----- يعني السبب بيبقى منا وفينا ----- وظواهر المدنية عمتزحف اكتر واسرع على اليازدية اللي كان اسمها ضيعة بقى عن اي خيم غار عمتحكو---- ومرحبا تراث تراثنا صار تراث الدخان والموتور والاراكيل والصياعة والموبايل وحدث بلا حرج ------ شكرا لشاعرنا على هالموضوع اللي بيخلي الواحد يحن ويتحسر على هديك الايام ----وتحياتي للجميع

أنا بالنسبة ألي الموضوع كتير عادي لأنو نحنا لهلق منعمل خيمة غار وهي الصيفية عملنا وحدي