إلى أمي

إلى أمي


هذه القصيدة ربحت مسابقة عيد الأم في موقع آخر وتسلمت الدرع


بليلة برد وشتي يا أمّي أنا سهران
غربة وبعد وهموم بالقلب تكويني

ع بعدك يا حنونة طفلك كتير بردان
وينها اللي كانت بلحاف عطفها تغطيني

يا مدرسة الوفا يا إمي يا نبع الحنان
من هالنبع جرار حبك سقيتيني

كلمة ماما نطقتها بحضنك الدفيان
وبعدها هالكلمة لليوم عايشة فيني

بضل العمر طفل وعم اطلب التحنان
وبنده ماما لو صرت كهل سبعيني

بعرف قديش عالسفر عم تشتكي الحرمان
وبعرف لو نسيتك يوم مش رح بتنسيني

صلّي لأجلي ماما وقدمي القربان
الرب منك بيسمع وبغربتي بيحميني

وطلبي منو يصبّرك بالصلا وبالإيمان
ليوم ما ارجعلك وع صدرك تضميني

سافرت وغيابي غصب عني كان
بتعرفي الإيام شو عاملة فيني

انشلا بسرعة يمرق ويغيب الزمان
وشوفك بأرض الوطن عم تلاقيني

ويرجع بعد السفر إبنك كنعــان
وترتاح عيونك من الدمع يا تقبريني


كل عام وكل الأمهات بخير

بتستاهل الف درع
يسلم هالتم

و الله يخليكون لبعض و يخلي كل امهات العالم و يرجع كل مغترب لاهلو بخير و سلامة يا رب

ينعاد عالجميع يا رب بالخير و الصحة

عنجد يا شباب يعطيكم الف عافية الواحد منا بيكبرفيكم بس يشوف الناس اللي من ضيعتو عم تدخل وتشارك بكل الكلمات والمواضيع الحلوة والمشاركات اللي عم تكتبوها

حلوة كتير هالقصيدة حب وحنان وعطف الدنيا كلها ما بيكفي لتعبر عن كل هالعيد

بمداخلة صغيرة اسمحولي قول يعطيكم الف عافية

الله يخلي كل أمهات العالم وامهاتكم عنجد انا فخورة بهيك موقع وبهيك ضيعة

يعطيك الف عافية يا كنعان والله بتجنن هالكلمات
وكل عام وكل الامهات بخير

الله يا كنعان عنجد لقب شاعر الضيعة بتستاهلو بجدارة
وانا بدوري بقول انشالله بينعاد على كل الأمهات بألف خير
وبيرجع كل شب مغترب لأهلو وحيج بقى غربي وشقى وتعتير

يسلم هالتم يا ابن خالي وكل عام وكل ام بالف خير

yazdawib7a2
angel
john issa
mark
bedrous muradian

أعزائي أشكر مروركم الكريم على كلماتي المتواضعة
ودمتم بخير وكل عام وكل الأمهات بخير والرحمة للمتوفيات منهن .