الإمارات العربية المتحدة هل هي خيار أم فرض ؟

قبل ستة أعوام كنا وبعد نهاية دراستنا الإعدادية نقف أمام خيارين:
التعليم العام – التعليم المهني والفندقية
أما مؤخراً دخل خيار لا أدري ربما فرض على الخط هو السفر إلى الإمارات العربية المتحدة للعمل
فأرجو منكم أن نحدد سلبيات وإيجابيات هذه الظاهرة جماعياً لكي لا أكون قد نظرت إلى الأمر من وجهة
نظر شخصية قد تكون ضيقة في الرؤية
لذا فهذا الموضوع هو للتشاور والمشاركة الجماعية .

من أجل التوضيح فقط
أنا أقصد بالمسافرين إلى هذه البلد من الأطفال الذين يفكرون بالسفر من سن الخامسةعشر
وهذه الظاهرة هي التي لفتتني والدليل أنني ذكرت المراحل الدراسية على هذا المفترق العمري
أما عن إيجاد فرص العمل فهي مبررة ولو في الصين ولكن لمن أصبح راشداً ويمتلك مهنة يحفظ بها
كرامته في الغربة لا أن يتمرمط في أوحال الغربة وهو صغير السن بدون مهنة وهوية
لذلك اقتضى التنويه

صراحة هيدا موضوع مهم وحساس يا مجد :


اولا من وجهة نظر بسيطة طموح الشباب غير متوفر في بلدنا
ثانيا و الاهم المشكلة تكمن في الاهل و التربية في مكان لم يعد للعلم من مكان
فالشباب من نعومة اظافره تراه في احد المطاعم او المقاهي يكسب رزقه ويعيل اهله خارج اوقات الدراسة
يتربى على المدخول و ينسى المدرسة , يرى هذا الطريق الانسب و الاسرع لكسب الرزق في المستقبل مع دعم من اهله .
بالطبع للموضوع ايجابيات وسلبيات اكتر :

فمن ايجابياته التعرف على حضارات مختلفة و جديدة و تعلم لغات مختلفة بالاضافة الى الكسب المادي .
اما السلبيات فحدث بلا حرج : قلة الوعي و الثقافة , التزاوج من حضارات لا نعرف منها شيئا
المستوى العلمي المتندي , و الخ

خيي مجد عدد شباب اليازدية المتواجدين بالامارات فقط يتجاوز 400 شاب 95 % يعملون في مجال المطاعم والفنادق
و عينك تشوف كيف حياتهم و كيف البعض عم يتحمل الامرين نتيجة اخطاء والديهم .
الموضوع مهم بس العتب على الاهل و التربية
يا جماعة انا ما كنت متحيز لاحد في الرد على الموضوع , انما سردته بشكل موضوعي لتنبيه اهالينا لكي يتبنو العلم سلاحا لاولادهم لا المطاعم و الملاهي و الديسكوات .

مع جزيل الشكر
زياد حنا

انا ما انتبهت عموضوعك مجد وبعتبر الموضوع يلي حطيتو بمنتدي المغتربين الغربة إلى اين
وبعتبر موصوعي رد عموضوعك

ولا يهمك ابن العم وصل
بتمنى اسمع ردود اكتر حتى نوصل للنتيجة المطلوبة من طرح هيدا الموضوع وهيي
رح تكون خلاصة عامة

بحب اشكر كل المشاركين بهالموضوع و بس بدي ا ضيف انو ضيعتنا من الضيع الفقيرة الموارد لذلك و للاسف في اغلب الاحيان عم تكون الغربة الخيار الوحيد بس بحب اكد انو العلم سلاح قوي بايد الانسان سواء بالغربة او ببلدو

مزبوط ضيعتنا افيا موارد رزق بس هيدا من ايدنا الانو كل العالم محدا منون بيفكر يفتح شي مشروع مهم

وبدي اعطيك عدة امثلة يلي ميسافرو ميرجعو معن راس مال يا بيفتحو شي دكان يا شي كفتيريا عكام صندويشة يا تجارة صغيرة بيكفي فيا حالو

ازا هيدا هوي راس المال يلي راكدين وراه يعني بدي قول شي 100 -200 الف فيني افتح فيون ها المشاريع يلي قلتا اي واحد من الضيعة يلي مو مسافرين فية يعمل هيك واكتر

ازا هيك بدنا نضل رح يضل وضعنا تعيس ورح تضل الهجرة الحل الوحيد

طيب منقول ما فتحو دكان او كفتيريا لا بقلك صحح معلوماتك
ما عملو غير هيك او ما عملو شي وبلنسبة لتاسيس الحال اسا الاغلبية مالمو حق البدل وصرلن عالقليلي4 سنين
وازا عملو شي هون بيكون بمساعدة اهلون اكيد وطبعا حكينا ما بينطبق عالكل بس بينطبق عالاغلبية
انا بدي اسالك سؤال شي ترجع لهون شو بدك تشتغل ولا مقرر تكفي كل حياتك بالغربة

و بتمنالك التوفيق بكل خطوة

]لكي ما ننفهم بعضنا غلط ,انا ما عم دافع عن الغربة وما في حدا بيقلك انه الغربة حلوة ولو شو ما كان وضعوا بيضل اسمها غربة
وانا معك انو حرام اي شب او اب يبعد عن اهله وولاده لانه هالحياة بتجينا مرة مو عشرين
انا معك بكل هالاسباب بس انت يا سعد اخدت امثلة او بالاحرى استثناءات من الضيعة و ما اخدت القاعدة العامة
اللي عم تقول انهم فتحوا كفتيريا او ما شابه 2 او 3
واللي ما لموا حق البدل خليني قول 6 او 7
بس على ما اعتقد عدد المغتربين عنا بيوصل ل 300
من جهة تانية انا اكيد مو مفكر اقضي بقية حياتي بالغربة بس اللي اكيد منو كمان و بهالوضع الراهن انو الهجرة هي السبيل الوحيد لتأمين مستقبلي
وبالمقابل انا رح اسالك سؤال انت الان عم تدرس تجارة
بس تتخرج شو مفكر تعمل

يا جماعة الغربة صعبة وهيدي حقيقة يمكن أنا ما عشتها بالمعنى الأصعب بقصد البعد عن البلد
(أنا باللاذقية وبحس بشوية غربة ومتل ما بيقولو الحمصي إذا راح على حماة أسبوع بيصير يحلف
بغربتو)
وأي خيار صعب بالحياة لازم نلمس نتائجو حتى نستسيغ الصبر عليه
وهون أنا بضم صوتي لصوت سعد يعني إذا الواحد ما عمل شي مشروع مهم يستر فيه آخرتو
فهوي رح يكون بموقف حرج بهديك الأيام
شوفو لبنان أو الإمارات كل سياسات الدولة عندن بتعتمد على سياحة و مهرجانات ومناسبات مارقة
ولما بيجد الجد ما في لا صناعة ولا تجارة ولا شيء دائم
ونحنا لازم ننتبه لهلنقطة معقول ما في باليازدية معمل أو مشغل أو شي مصلحة بتعم بربح عام؟؟؟؟؟؟؟؟
ليش نحنا غير قادرين نجمع شريكين يفتحو هيك مصلحة إذا سلمنا جدلاً أنو واحد مافيه لحالو؟؟؟؟؟؟؟؟؟
ولا وين هالأموال يا فادي ؟؟؟؟؟ بتصور كلا راحت على بيوت وعمارات صحيح أنها حلوة بس ما بتطعمي
الخبز
المال إذا ما تحرك بيخلص.........
يمكن شطيت شوي عن الموضوع الأصلي بس حبيت وضح شوية أمور
ما حدا يا شباب تعرض لموضوع الأطفال اللي ميسافرو كتير منيح نحكي عن الموضوع من كل جوانبو
بس الظاهرة اللي ذكرتها خطيرة ...........
بتمنى مشاركات أكتر والله يقويكم جميعاً ولا يضيعلكم تعب لا بالغربة ولا بالبلد

الغربة بحياتا ما كانت خيار
اي شخص لو بلدو قدمتلو فرصة اقل بشوي من الفرصة اللي عم ياخدها برة, ما بعتقد كان طلع و اتغرب
يعني ما بعتقد حدا بيختار انو يولدو ولادو بعيد عنو لمجرد انو بدو بتغرب؟ او حتى يبقى بعيد عنون
على كل موضوع انو الكل صار بدو يسافر صار بسبب الممارسات الخاطئة لفئة من الشباب هونيك بالغربة و بالضيعة
و متل ما قال زياد الوعي و التربية المنزلية بتعلب دور كتير كبير بهادا الموضوع
اذا الكبار مش واعيين لهالموضوع؟ كيف بدك يا مجد الصغار يفهموا؟
مع تمنياتي للجميع بالتوفيق و الخير و الصحة

الغربة هيه خيار مر ولكل منا اسبابه الخاصة.....انا لا اؤمن بمبدأ الهروب من خدمة العلم لانها عذر اقبح من ذنب....معظمنا اختار الغربة لتحسين وضع معيشي ومساعدة اهله و تامين مستقبله باقصر مدة ممكنه و العوده الى القرية....لكن عندما تاتي الى الامارات تتغير طموحات اوطلبات او رغبات الجميع<العزابيه خصوصا>والمغتربين انواع مثل اهل القرية المحترمين هناك من انتج وساعد وهناك من فشل وكذلك لكل اسبابه.......لا اريد ان اطيل لكن اتمنى لكل شباب القرية النجاح في حياتهم داخل او خارج القرية

يا شباب الغربة ما نها كلمو سهلة واللي ما عندو قوة ارادة مارح يقدر ينجح بحياتو
والي طلع ع الغربة مطلع لانو بحب الغربة اكيد اول سبب الجيش واللي قال انو يضل بسوريا من شان الجيش اينو احسن
انك تتبهدل من م ظابط عندك بسوريا او تطلع تتعلم بالسنتين او الخمس سنين ويدخل شوية مصاري اكيد رح يكونو مالون طعمة بس ع القليلة بتعرف حالك انو انت متشتغل
وشغلة تانية مين بسوريا اللي مصار عندو هدف انو يترك الجيش ويهرب وبعدين الشغل بسوريا هلق كتير في شغل او بس اللي اهلو معون شوية مصاري او حتى اللي معون مصاري ولادون عم يفلو من سوريا
كلوهون كرهان تيابو بس وين بدو يرجع وع شو بدو برجع
شباب الله يوفق الكل وع قبال كل سنة

ازا لها الدرجة يا syrianشايف انو وضع سورية كتير صعب و مافي شغل و بتتبهدل بلجيش
بدي اسالك عدة اسالة
اول شي لشو مسمى حالك syrianازا مو عاجبك عالقليلي الوضع
ازا رجعت شو بدك تشتغل
ما كان فيك تلاقي هالشغل قبل متروح وتضل فية وتستمر عالقليلي كنت ترفعت وتعلمت هون كمان وطيلعتلك قرشان
انا ماني ضد حدا وانا بتمنى التوفيق للكل

بكل صراحة و اختصار !!!!

الإمارات العربية ليست فرض بل هي خيار مفروض !!!!!

الامارات ليست فرض ولاخيار وكل انسان يطمح للافضل لتحسين وضعه واوضاع اهله ونشكر الله ان الفيزا الاماراتية سهلة مقارنة بغيرها وكل انسان يرسم الطريق الذي سيسلكه

محل ما بترزق بتلزق
العمل الناجح من اهم مقومات نجاح الانسان لانه من خلاله يؤمن جميع متطلبات الحياة
سواء كان في سوريا او الامارات او الصين
بعض الناس لا يغادروا سوريا حتى لو ملّكتهم برج العرب
بس صارت العملية موضة هل الايام ,اغلب الشباب عم يستغنوا عن العلم و الدراسة فليس هناك مهرب الا الخليج لتحقيق طموحاتهم
مع انه اغلب المغتربين عمالة عادية و ليس عمالة ماهرة , ففرق العملة لعب الدور بتحسين المستوى المادي

أنا أعتفد أن هذا الخيار سبب المشاكل للشباب من ناحية التحصيل العلمي
فعندما يرى الشاب في التعليم الثانوي أن هذا الخيار أمامه فتخف عزيمته ولا يدرس ولا يحصل العلامات التي كا ن من الممكن تحصيلها إذا بذل جهد دون دخول هذه الفكرة في رأسه

وأيضا إنها مشكلة طبيعية عند الأهل عندما يشاهدون أولادهم يغتربون بحثا عن العمل بينما كانوا يستطيعون الدراسة وتحصيل العمل هنا في بلدنا

برأيي انو اغلب واذا ما كان كل يلي بيسافر للعمل بالخليج بيسافروا لاسباب اقتصادية طبعا هذا السبب كان من عشرين سنة اما الان السبب الرئيسي للسفر موبغرض العمل انما بسبب تجنب الجيش هذا اولا اما ثانيا الغيرة كيف فلان بيسافر وبامنولوا شغل ليش ابني مابيسافر طبعا هذا جهل من الاهل واكيد هني بيكونوا وراء ضياع اولادهم بس كمان انا بشوف انوا الواحد منا اذا سافر وكان شخص واعي وبيعرف لوين رايح وليش رايح وكان قد المسؤلية وناجح بعملو فأنا معو اما السفر بغرض انو سافر فهذا غلط من الاساس وما بني على غلط فهو غلط وانا ما بعرف ليش الكل بيركض على الامارات مع انو الكل بيعرف انو اغلب الموجودين بالامارات غير موفقين باعمالهم ونحنا هون بالسعودية عم نحاول نعمل يازدية ثالثة مثل ما عاملين بالامارات يازدية ثانية بس ضيعتنا هون بس للموفقين باعمالهم يعني مافي واحد يجي بس لانو بدوا يسافر يعني اذا مافي نتيجة مافي سفر وشكرا

مرحبا يمكن فرض او اكيد فرض يامجد ويمكن انت بتعرف السبب وانا بعرفو